Төрийн албаныхны бужигнаан эхэллээ дээ гэж иргэд халаглах боллоо. УИХ, НИТХ-ын сонгуульд АН-ынхан олонхи болсон. Тиймээс төрийн албанд олон жил ажилласан МАН-ын угшилтай хүмүүсийн албан тушаал нь ганхаж эхлэв. АН-ынхан Ерөнхий сайдаа томилчихвол Э.Бат-Үүл хотын мэр болно. Засаг төр эмхлэгдэхгүй байгаагаас шалтгаалан тэрээр албан тушаалдаа очиж чадахгүй гацчихаад байгаа. Уг нь, одоогийн Засгийн газрын тэргүүн С.Батболдоор өөрийгөө батламжлуулж болох ч тэрээр АН-ынхаа Ерөнхий сайдаас хотын дарга гэсэн хэргэм цолоо авах сонирхолтой байгаа аж. Төр засгийн энэ мэт зүйлээс болж ойрын өдрүүдэд төрийн албаныхан ажлаа хийхээ болиод байгаа гэнэ. “Нэгэнт л бүтцийн өөрчлөлт хийж албан тушаал минь өөрчлөгдөхөөс хойш ажлаа хийсэн ч, хийгээгүй ч ялгаагүй” гэсэн хандлагатай төрийн албан хаагч олон болсон гэж иргэд шүүмжлэх болж. Ийм байдалтай ажиллаж байгаа газруудыг дурдвал яамд, агентлаг, НЗДТГ-ын албан хаагчдыг нэрлэж болох юм.
Ингэхдээ бүтэц зохион байгуулалт нь өөрчлөгдөж, халаа сэлгээ хамгийн ихээр хийгдэх газрын жагсаалтыг Нийслэлийн Засаг даргын тамгын газар тэргүүлж байгаа гэсэн. Энд ажилладаг зарим нэг албан тушаалтан сэтгэл зүйгээ бэлдэж “Би халагдах нь тодорхой. Төрийн албан хаагчийн насны хэмжээ /65 нас/ болох хүртэл нэг газар шургалж байгаад тэтгэвэртээ гарна даа” гэж ярих томоохон албан тушаалтантай хүртэл тааралдав.

Улсын баатар нийслэлээ хөгжүүлэх их ажлаа Нийс­лэлийн Засаг даргын тамгын газрын бүтцийг өөрчилснөөр эхлэх гэнэ. Ингэж бүтцийн өөрчлөлт хийхдээ төрийн албан хаагчийг зүгээр л ажлаас нь халаад явуулчихгүй нь тодорхой. Төрийн албаны тухай хуульд хоёр ба түүнээс дээш удаа албан үүргээ хангалтгүй биелүүлсэн, гэмт хэрэг үйлдсэн нь нотлогдож шүүхийн таслан шийдвэрлэх тогтоол хүчин төгөлдөр болсон. Монгол Улсын харьяатаас гарсан тохиолдолд төрийн албан хаагчийг ажлаас халах үндэслэл болно гээд заачихаж. Түүнээс нийслэлийн удирдлагад АН-ынхан гарсан учир нэгэн цагт МАН-ын батлах өвөртөлж явсан хүмүүсийг ажлаас нь халж болно гэсэн заалт хуульд алга. Төрийн албан хаагчийг ажлаас нь халахад учир бий. Эхлээд намын харьяаллаар нь ангилна. Үүний дараа албан ажилдаа хариуцлагагүй хандсан гэсэн үндэслэлээр нэг хэсэг хүнийг тушаал бууруулна. Ийм замаар АН-ынхан Нийслэлийн ЗДТГ-ын томоохон албан тушаалд өөрийн хүмүүсийг шургуулна. Үүнээс өөр шилэгдсэн нэг арга бий. Тухайн газар, хэлтэс, албадын нэрийг өөрчилнө. Ингээд шинэчлэгдэж, өөрчлөгдсөн газар хэлтэст бүтцийн өөрчлөлт хийсэн гэсэн нэрийн дор хүмүүсийг цомхотголд оруулна даа. Улсын баатар Нийслэлийн Засаг даргын тамгын газрын бүтцийг өөрчлөх төлөвлөгөөгөө хэдий нь боловсруулсан сурагтай. Э.Бат-Үүл хамгийн түрүүнд орлогч дарга нараа сонгоно. Тэрээр дөрвөн орлогчтой байхаар төлөвлөжээ. Гэхдээ одоогоор үүнийгээ эцсийн байдлаар шийдээгүй байгаа аж. Ингэхдээ Нийслэлийн АН-ын дөрвөн дэд даргаа Нийслэлийн Засаг даргын орлогч болгох сураг дуулдав. Э.Бат-Үүлийг хотын даргаар ажиллах хугацаанд П.Батчимэг, Н.Батаа, Ц.Энхцэнгэл, Ц.Баатархүү нар нийслэлийг өөрчлөх их ажилд Баатартай гар нийлэн ажиллах гэнэ.

Засаг барих нам солигдох бүрт халаа сэлгээ хийдэг нь бичигдээгүй хуулиар зохицуулагддаг зүйл. Хамгийн гол нь, ажлаа мэддэг хүнийг л тухайн ажилд томилох нь чухал гэдэгт санал зөрөх хүн гарахгүй л болов уу. Ер нь, сонгуулийн дараа төрийн аль ч байгууллагад халаа сэлгээ хийгдэх нь энгийн зүйл. Гэхдээ ажлаасаа халагдсан, албан тушаал буурсан хүн бүр үүнийг таатай хүлээж авдаггүй.

Орон тооны цомхотгол болоод ямар нэгэн шалтгаанаар ажлаас халагдсан төрийн албан хаагчид гэнэт халагдсаны мөнгөө аваад өөр газар ажилд орохоор анкет бөглөж, дараагийн ажлаа хүлээн сууна. Харин хэл ам, хэрүүл шуугиан хийхээс түүртээгүй нэг нь Төрийн албаны зөвлөлд хандана.
Төрийн албаны зөвлөл маргааныг хянан хэлэлцээд ажил олгогчийн буруу, тухайн хүнийг ажилд нь эргүүлэн авна уу гэсэн албан бичиг явуулна. Гэвч тухайн газар нь халаад явуулсан хүнээ ажилд нь эргүүлэн авч байсан тохиолдол урьд өмнө нь гарч байгаагүй. Ийнхүү Монголын хууль улс төрийн намуудын өлмий дор оршсон хэвээр л. Энэ байдал цаашдаа хэдэн жил үргэлжлэхийг таашгүй. Ямартай ч, төрийн албан хаагчийг ажлаас нь үндэслэлгүйгээр халсан албан тушаалтныг 45-60 мянган төгрөгөөр торгоод л болоо. Хэрэв Төрийн албаны зөвлөл тухайн ажилтныг ажлаас нь үндэслэлгүй халсан гэдгийг тогтоосон ч ажилд нь эргүүлэн авахгүй байгаа албан тушаалтанг өөрийг нь халах хүртэл арга хэмжээ авах эрхтэй байдаг аж. Гэвч өнөө хэр нь ийм шийтгэл амссан удирдлагууд ч алга.