Өмнөх УИХ хаалгаа барихаасаа өмнө АТГ-ын орон тоог нэмсэн. Ингээд 90 ажилтантай байсан АТГ-ын орон тоог нэмж, 145 болгосон юм. Гэтэл орон тоо нь нэмэгдсэн тус байгууллагын цалингийн багц өдгөө хасагдсан байх юм. Төсөвт АТГ-ын албан хаагчдын цалингийн багцыг хоёр тэрбум 900 сая төгрөг байхаар тугасгасан байж. Гэтэл Сангийн сайд Д.Хаянхярваа Засгийн газарт санал оруулж энэ газрын албан хаагчдын цалингийн багцыг 400-500 сая төгрөгөөр танах санал гаргажээ. Өнөө маргаашгүй байраа тавьж өгөх гэж байгаа Засгийн газар Сангийн сайдын оруулсан энэ саналыг таатайгаар хүлээн авч, дэмжсэн аж.
Үлдсэн хоёр тэрбум 400 сая төгрөг нь АТГ-ын 118 албан хаагчийн цалин гэнэ. Засгийн газрын гаргасан балагтай энэ шийдвэрээс болж АТГ-ын 27 албан хаагч бүтэн жилийн турш цалингүй ажиллах хэрэг үү. Нуухыг нь авах гэж нүдийг нь сохлов гэгчээр төсвийн зардлаа багасгах нэрийдлээр төрийн албан хаагчийг талхны мөнгөнөөс нь салгах шийдвэр гаргасан нь ямар учиртай юм бол оо. Төсвийн тухай хуульд цалинтай холбоотой зардлыг хасахгүй байх заалт байдаг биш билүү, Сангийн сайд аа.

Цалингаа тануулсан АТГ-ын ажилчид Сангийн сайдын энэ үйлдлийг гайхаж хүлээж авсан гэнэ. Аргаа барахдаа Сангийн сайд Д.Хаянхярвааг манай байгууллага шалгаад эхлэхээр бидний цалинг хасч хариугаа авч байгаа юм биш байгаа даа гэсэн таамаг хүртэл дэвшүүлсэн гэсэн шүү. Энэ байдлаараа АТГ-ынхан ажлаа хийж чадахгүй нь. Сангийн сайд хууль зөрчсөн байж магадгүй гээд шалгахаар цалинг нь хасаад хаячихна.  Одоо тэгээд яахав, цалин мөнгө хасагдаж мэднэ гээд буруутай эсэхийг нь шалгаж чадахгүй, зүгээр тавиад явуулах хэрэг үү.  Ер нь, АТГ-ынхан гэж аргаа барсан хүмүүс байх юм.
Энэ байгууллага авлигатай хэдий сайн тэмцэнэ төдий хэмжээгээр хохирдог болоод буй гэхэд ч дэгсдүүлсэн болохгүй. Нэг бол даргыг нь гадаадад аваачаад хороочихно, үгүй бол шоронд хийчихнэ. Урьд өмнө нь дарга нарыг нь ийм маягаар шийтгэдэг байсан бол одоо ажилчдыг нь яллаж эхэлсэн нь энэ үү.