УИХ-ын гишүүн, Батлан хамгаалахын сайд  Ж.Энхбаяраас цөөн асуултад хариу авлаа.

-Эрх зүйн чадамж нь сонгуулиар дууссан Засгийн газар олон шийдвэр гаргаж байна гэж АН-ынхан хэлж байна. Одоогийн Засгийн газраас гаргасан төсөв санхүүтэй холбоотой асуудлыг судалж үзэх ажлын хэсгийг АН-ынхан гаргасан гэсэн?
-Засгийн газар УИХ-аас батлагдсан Төсвийн хуулийн дагуу төсөв бүрдүүлж зарцуулж байна. Хуулиас гадуур мөнгө зарцуулах эрх Засгийн газарт байхгүй. Хууль зөрчсөн зүйл байвал маш тодорхой тавих хэрэгтэй шүү дээ. Одоо бол сонгогч олны төлөөлөл болсон хүмүүс төрөө яагаад байгуулж чадахгүй байна гэдэгт анхаарлаа хандуулах хэрэгтэй. Бид ардчилсан нийгмийг сонгоод 20 жил болж байна.
Ардчиллын хамгийн үнэтэй зүйл бол цөөнхөө сонсох, зөвшилцөх. Хүчээр түрэх, тулгах, эрх мэдлээр далайлгах явдал ардчилалд аюул учруулна. Цөөнхөө сонсохгүйгээр улс төрийн шийдвэр гаргаж байгаа нь маш буруу.

 -АН-ынхан зарим яамны бүтцэд өөрч­лөлт оруулна гэдгээ мэдэгдсэн. Хэд хэ­дэн яамыг хоёр ху­ваана гэж бай­гаа. Үүнд ямар байр суурьтай байна вэ?
-Төрийн бай­гууллага, Зас­гийн газ­рын бүт­цийг дан­хайл­гаж орон тоо нэмж, сон­гуулийн мө­рийн хөтөл­бөрт туссанаас эсрэ­­гээр ажиллаж байгаад шүүмжлэлттэй хандаж байна.

-Нэгэнт, АН-ынхан энэ удаагийн сонгуулиар олон­хи болсон тул төрийн албанд шинэчлэл өөрчлөлт хийх нь гарцаагүй. Төрийн байгууллагад шинэчлэл хэрэгтэй гэж иргэд ярьдаг шүү дээ. Та үүнтэй санал нийлдэггүй хэрэг үү?
-Шинэчлэл хэрэгтэй. Гэхдээ АН-ынхны яриад байгаа шиг ийм шинэчлэл хэрэггүй. Засгийн газрыг данхайлгая, төрийн хяналт, төрийн албыг татан буулгая гэж ярьж байна. Бид үүний эсрэг хатуу зогсоно. 1996 оны сургамжийг мартаж болохгүй.
Ардын хянан шалгах хороо гэж хяналтын бүх системийг  татан буулгаж 70 жил бий болсон Монголын нийгмийн баялгийг яаж үрэн таран хийсэн билээ дээ.
Харин одоо дахин төрийн хяналтыг татан буулгахыг хэрхэвч хүлээн зөвшөөрөхгүй. Уучлаарай.

-Танай нам УИХ-д бүлэг байгуулж чадсангүй. УИХ-д 25 сул гишүүнтэй боллоо. Гэтэл танай намынхан хуралдсанаа бүлгийн хуралдаан гэж тайлбарлаад байх юм. Энэ нь хууль зөрчиж байгаа хэрэг биш гэж үү?
-УИХ-д улс төрийн намууд бүлэгтэй байх эсэхийг цагаар хэмжихгүй. Хууль сайн унш. Үндсэн хуульд УИХ-д наймаас дээш гишүүнтэй нам бүлэг байгуулж болно гээд заачихсан байгаа.

-МАН-ынхан шинэчлэл гэж ярих болж. Гэхдээ энэ нь шинэчлэл гэдэг үгнээс хэтрэхгүй байгаа юм биш үү. Танай нам үнэхээр ши­нэчлэгдэж чадаж байна уу?
-Шинэчлэл тасралтгүй явах ёстой. Улс  төрийн үйл ажил­лагаанд манай  нам оношоо тогтоолоо. Үүндээ тохирсон эмчилгээ хийж байна.

-Танай намын гишүүд төрийн ажлаас намын ажлыг дээгүүр тавьж байна. Намынхаа Бага хурлыг хийж байгаа учир Анхдугаар чуулганд суухгүй гэсэн хариу барьсан шүү дээ. Таны хувьд намын ажил, төрийн ажил хоёрын алийг нь нэгдүгээрт тавьдаг вэ?
-Өнөөдөр улс төрийн намаар дамжин төрийн эрх барих дээд байгууллага бие болж байгаа биз дээ.
Хүссэн хүсээгүй улс төрийн намууд Монголын төрийн эрхийг барих үүргийг гүйцэтгэж байна шүү дээ.