Сүхбаатар дүүргийн шүүх МАХН-ын дарга, Ерөнхийлөгч асан Н.Энхбаяр нарт холбогдох хэргийг гурав дахь өдрөө хэлэлцэж байна. Улсын яллагч Е.Сагсай шүүгдэгч нарт төлөвлөсөн ялын тогтоолоо танилцуулав. Тэрээр шүүгдэгч Н.Энхбаярт төрийн албанд ажиллах эрхийн нь дөрвөн жилээр хасч, 8,6 жил хорих ял оноож, ХААН банкин дахь данснаас 89,3 сая ам.доллар, байрыг нь хураахаар төлөвлөжээ. Шүүгдэгч Д.Дуламсүрэнд мөн төрийн албанд ажиллах эрхийг нь дөрвөн жилээр хасч, 6,1 жил хорих ял оноож, байр болон 10 сая төгрөг хураахаар санал гаргалаа. Тэднийг Эрүүгийн хуулийн албан тушаалаа урвуулан ашиглах, бусдын эд хөрөнгийг завших гэсэн зүйл ангиар буруутгаж байна. Харин До.Чулуунбаатарыг бусдын эд хөрөнгийг завшсан гэсэн зүйл ангиар буруутгаж 10 сая төгрөг хурааж, 5,1 жил хорих ял шийтгэх санал гаргав. Ж.Мягмаржаргалд мөрийтэй тоглосон, бусдын эд хөрөнгийг завшсан гэж “Лексус” маркийн машиныг нь хурааж, 6,6 жил хорих ял оноохоор төлөвлөжээ. Шүүгдэгч Н.Энхбаяр, До.Чулуунбаатар, Ж.Мягмаржаргал нарт оноох ялыг эрэгтэйчүүдийн чанга дэглэмтэй хорих ангид эдлүүлэх бол Д.Дуламсүрэнд оноох ялыг эмэгтэйчүүдийн жирийн дэглэмтэй хорих ангид эдлүүлэх саналтайгаа улсын яллагч Е.Сагсай хэлсэн юм.
Шүүх хурал одоогоор өмгөөлөгч нарын цагаатгах хэлэлцүүлгээр үргэлжилж байна.