“Монгол Улсын Их Хурлын гишүүн би ард түмнийхээ элчийн хувьд нийт иргэн, улсын ашиг сонирхлыг эрхэмлэн, төрийн хуулийг дээдлэн сахиж, гишүүний үүргээ чин шударгаар биелүүлэхээ тангараглая!“ гэж УИХ-ын гишүүд тангараг өргөдөг. Уржигдархан МАХН-МҮАН-ын “Шударга ёс” эвслийн хоёр гишүүн эл тангаргийг өргөлөө. Харин МАН-ын зарим гишүүн өргөсөн тангаргаа умартаж, зөрчөөд байх шиг. Сар гаруйн өмнө бүрдсэн УИХ-ыг гацаах ажлыг гаргууд сайн хийж байгаа гол хэргийн эзэн яахын аргагүй МАН-ынхан. Ялагдлаа хүлээн зөвшөөрч бодит амьдралдаа бууж чадахгүй байгаа тэдний хувьд ард түмний элч болж, нийт иргэн, улсын ашиг сонирхлыг эрхэмлэн, төрийн хуулийг дээдлэн сахиж чадахгүй буй нь харагдсаар. Хэдхэн хоногийн өмнөхөн намынхаа ээлжит Бага хурлыг гурван өдрийн турш хуралдуулж чадсан мөртлөө өдий болтол улсын ажлыг явуулахыг хүсэхгүй нь даанч харамсалтай. Яагаад гэвэл тэд хүсэхгүй байгаа болохоор улсын эрх ашгаас дээгүүр улс төрийн, намын эрх ашгаа тавьж чадсан. Бүтэн гурван өдөр тэд улс төрийн эрх ашгаа нэн тэргүүнийх гэдгээ харуулсан.

Харин зарим нэг нь залгуулаад хувийн эрх ашгаа мөн л улсынхаас давуулан тавьж байна. УИХ-ын гишүүн гэсэн чухал үүрэг хүлээж авсан эрхмүүд гадаадын улс орнуудаар зугаалж, аялж явна. Зарим нь хөдөө орон нутагт найр наадам хэссэн шигээ амарч буй аж. УИХ-ын ирцийн мэдээнд мэдүүлснээр МАН-ын гишүүн У.Хүрэлсүх Франц улсад зорчиж байна гэв. Тэрээр ирэх долоо хоногт эх орондоо ирэх юм гэсэн. Харин УИХ-ын гишүүн Я.Содбаатар БНСУ,  Л.Энх-Амгалан Австри улсаас өнөөдөр ирнэ гэж ирцийн мэдээнд бичүүлжээ. Мөн МАН-ын зарим гишүүн гадаадад яваа мэдээлэл байгаа юм. Тэдний нэг нь УИХ-ын гишүүн Ц.Дашдорж. Тэрээр ирэх долоо хоногийн сүүлчээр морилон ирэх сураг байна. Энэ долоо хоногт л гэхэд Засгийн газрын хуралдаанд ЗТБХБ-ын сайдын хувиар оруулах ёстой байсан түүний асуудал танилцуулах хүн эзгүй учраас хойшилсон аж. Дараагийн Засгийн газрын хуралдаанд ч мөн тэрээр оролцохгүй нь. 

Тэгвэл хөдөөгүүр яваа гэсэн мэдээллээ Су.Батболд, Б.Бат-Эрдэнэ нарын гишүүд мэдэгджээ. Нийтэд мэдэгдэж байгаа нь эд болохоор ажиллаж буй хэмээн ирцэнд бүртгүүлсэн ч гадаад, дотоодод амарч, зугаалж яваа эрхэм гишүүд мэр сэр буй гэх. Иймээс л МАН-ынхан хуралдаж чадахгүй байна гэж тайлбарлах нь бий.
УИХ-ын гишүүн болсон МАН-ын цөөнгүй гишүүн эзгүй учраас хуралдаж чадахгүй байгаа бололтой. Хамгийн чухал нь тэдэнд энэ парламентын ажлыг цааш явуулах хүсэл сонирхол алга гэдгийг ахин дахин илтгээд байх шиг. Намынхаа хурлыг хийж, албан тушаалын томилгоо явуулахдаа бараг 100 хувийн ирцтэй цугладаг шүү дээ МАН-ынхан. Харин улс орны ажил тэднээс болоод таг гацчихаад байхад жишим ч үгүй амарч, аялж, зугаалсаар. Энэ зунжингаа амрахыг үгүйсгэхгүй. Сонгогдсон тойрогтоо ажиллаж байна гэж л гайхшруулахгүй байлгүй. Эрхэм түшээдийг хөдөө орон нутагт амрахаас өөр ажиллаж яваа гэсэн тайлбар хийхгүй буй заа.  Эзгүй гишүүдийн өмнөөс нүүрээ улалзуулан буй МАН-ын гишүүд Төрийн ордонд орохоос ч халширч байгаа аж. “Танай намынхан яагаад хуралдахгүй байна вэ” гэсэн сэтгүүлчдийн асуулт, телевизийн дуранд олзлогдчихоос болгоомжилж, Төрийн ордны албан тасалгаандаа ирж чадахгүй байна гэх болов.

Уг нь, УИХ-ын тухай хуульд гишүүдийг өргөсөн тангарагтаа үнэнчээр ажиллах ёстойг сануулсан байдаг. Хууль тогтоох дээд байгууллагад ард түмний төлөөлөл болж ороод сар гаруйн хугацаа өнгөрмөгц тэд хуулиа дагаж мөрдөхгүй зэсээ цухуйлгаж эхллээ. Хамгийн олон жил төрийн эрх барьсан намаас гарамгүй үйлдлүүдийг ээлж дараалан харуулж байгаа тэдний дараагийн арга ядсан үйлдэл юу байхыг тааж ядах юмгүй. 25-хан гишүүн цуглаж хуралдаад асуудлыг шийдчихвэл Монгол Улс даяараа эмх цэгцэндээ орох учиртайсан. Гэвч улс орны эрх ашгийг эрхэмлэхээ гараа өргөн байж тангарагласан МАН-ын гишүүд хаана явна. “УИХ-д МАН-аас сонгогдсон эрхэм гишүүд хаана, юу хийж явааг харсан үзсэн хүн байвал мэдээлэл өгнө үү” гэсэн зарлал тараах хэрэгтэй юм болов уу.

Юутай ч, “Хааны алба халаатай, эзний алба ээлжтэй” гэдэг үгийг МАН-ынханд сануулах цаг болжээ. Засгийн газар дараагийнхаа танхимд халаагаа өгч, улс орныхоо ажлыг эмх цэгцэнд оруулах цаг хугацаа өдрөөр бус минут секундээр хэмжигдэж байна. Улс орон даяар, хот хөдөөгүй “Тэртээ тэргүй дараагийн Засгийн газар байгуулахдахаар халагдах юм чинь” гэсэн Засаг дарга нар сэтгэл хоёрдож, налгар, цалгар байдалтай байгаа нь нүдэнд илхэн харагдана. Энэ бол зөвхөн МАН-ынхнаас бол Монгол Улс идэвхгүй байдалд орж, сөөм ч болов урагшлах ажил ч гэж алга байгааг харуулна.
Тиймээс төрийн сүлдэнд мөргөж, тангараг өргөсөн МАН-аас УИХ-д суугаа гишүүд ээ хуралдаанаа хийж, шийдвэрээ гаргаж, УИХ-ын ажлыг гацаахаа болиоч ээ.