Шинээр сонгогдсон парламентын ажил дахин гацаанд орох вий гэсэн хардлага төрөх боллоо. Энэ нь Сүхбаатар дүүргийн шүүхэд гурван өдрийн турш үргэлжилсэн МАХН-ын дарга, Ерөнхийлөгч асан Н.Энхбаярын шүүх хуралтай холбоотой.

 МАХН-МҮАН-ын “Шударга ёс” эвслийн Удирдах зөвлөл хэд хоногийн өмнө хуралдаж, хамтарсан Засгийн газар байгуулахад баримтлах суурь зарчмын тухай тогтоол гаргасан юм. Тогтоолд “Засгийн газар байгуулахад болон түүний үйл ажиллагаа явж байх хугацаанд төр засгийн аливаа институцийн зүгээс улс төрийн хэлмэгдүүлэлт гаргах аваас МАХН-МҮАН-ын “Шударга ёс” эвсэл хамтарсан Засгийн газар байгуулах талаар ярилцаж буй хэлэлцээг зогсоох бөгөөд хамтарсан Засгийн газрын үйл ажиллагааг дэмжихгүй байх, түүнээс гарах болно гэдгээ ил тод мэдэгдсүгэй” гэжээ. Үүнээс үзвэл, “Шударга ёс” эвслийнхэн хэрэв шүүхээс МАХН-ын дарга Н.Энхбаярт ял оноох л юм бол улс төрийн хэлмэгдүүлэлт гэж үзэх нь тодорхой гэж ойлгогдож байна.

Улмаар хамтарсан Засгийн газраас гарах нь. Нөгөө талаар Удирдах зөвлөлөөс гаргасан энэ тогтоол нь АН-ынханд өгсөн сануулга ч байж мэдэх нь.
Шүүх бол улс төрөөс хараат бус ажилладаг байгууллага. Гэтэл сүүлийн үед улс төрийн намууд шүүхийн үйл ажиллагааг улс төртэй хольж хутган, хараат бус байдалд нь нөлөөлөх оролдлого хийх болж. Энэ “аян” нь бүр олны өмнө ил өрнөж байна. МАН-ын дарга Ө.Энхтүвшин “Шүүхийн шатанд байгаа манай хоёр хүний асуудлыг хурдан шийдвэрлүүлж өг” гэж УИХ-ын дарга З.Энхболдод шаардлага тавьсан нь сонгодог жишээ. МАХН-ын даргад, Ерөнхийлөгч асан Н.Энхбаярт шүүх ял оноочихвол МАХН-МҮАН-ын “Шударга ёс” эвслийнхэн дээрх тогтоолоороо ямар ааш аяг гаргахаа ч ил тод мэдэгдчихлээ. Тэд “Төр засгийн аливаа институцийн зүгээс улс төрийн хэлмэгдүүлэлт гаргах аваас...” гэж шүүх байгууллагыг тодорхойлсон нь илт.    

МАХН-ын дарга Н.Энхбаярын шүүх хуралтай холбоотойгоор УИХ дахь “Шударга ёс” эвслийн бүлэг өчигдөр ээлжит бус хуралдаан хийлээ. Тэд Удирдах зөвлөлийн хуралдаанаар шийдвэрлэсэн асуудлаа голлон ярилцсан байна. Өөрөөр хэлбэл, Удирдах зөвлөл МАХН-ын дарга, Ерөнхийлөгч асан Н.Энхбаярыг Шадар сайдад нэр дэвшүүлэхээр санал нэгдээд байсан юм. Бүлгийн ээлжит бус хурлаараа хэрэв шүүх Н.Энхбаярт ял оноочихвол цаашид хэрхэх вэ гэдгээ ярилцсан гэнэ. Ингээд шүүхээс гаргах шийдвэрээс хамаарч, улс төрд дараагийн алхмаа хийхээр тохиролцсон бололтой.  

Уг нь, АН, МАХН-МҮАН-ын “Шударга ёс” эвсэл, ИЗНН хамтарсан Засгийн газар байгуулах анхан шатны хэлэлцээрээ амжилттай дуусгасан. Засгийн газрын бүтцэд боловсон хүчний томилгоо хийхдээ АН 75 хувь, “Шударга ёс” эвсэл 25 хувь байхаар тохирсон юм. Харин хоёр дахь шатны хэлэлцээрээр МАХН-МҮАН-ын “Шударга ёс” эвсэл Шадар сайдтай нийлээд дөрвөн сайдын суудал авахаар ярилцаж байгаа. Тэгээд ч “Шударга ёс” эвслийнхэн МАХН-ын дарга Н.Энхбаярт ял оноолоо гээд АН-тай хамтарсан засаг байгуулна гэж хийсэн гэрээгээ цуцлаж, ураад хаячихгүй байлгүй гэж олон хүн найдаж суугаа.
Учир нь, улс эх орны эрх ашиг гэмт хэрэгт холбогдсон хүнийхээс доор байх ёсгүй.