Монгол Улсын соёлын гавьяат зүтгэлтэн, Д.Нацагдоржийн шагналт, "Болор цом"-ын эзэн яруу найрагч Арлааны Эрдэнэ-Очир агсан сэрүүн тунгалаг ахуйдаа ном тээсэн тэмээн жингийн аян зохион байгуулах тухай мөрөөдлөө үзэг нэгт нөхөддөө олонтаа ярьж, ажил хэрэг болгохоор шулуудаж байсан юм. Найрагчийн хүү Э.Цагаан-Уул аавынхаа энэ хүсэл мөрөөдлийг биелүүлэн, үйл хэргийг нь мөнхжүүлэхээр болжээ.
"Зүүдний цэнхэр алсаас эхлэлтэй, түүнээсээ гэгээ түүж биелүүлэх хүсэл эрмэлзлэлийг аав минь олон жил ярьсан даа... Аавынхаа тэр зүүдийг биелүүлж, хийх ажлыг нь үргэлжлүүлэх гэж буйдаа миний сэтгэл туйлаас их хөдөлж, ийм нэгэн төслийн ажил эхлүүлээд бэлтгэл ажлыг хангаад явж байгааг олон нийтэд дуулгахад таатай байна. Номын цагаан буян ямагт дэлгэрч, ноён нуруу болсон аавын минь үйл хэрэг мөнхөд үргэлжилнэ ээ..." хэмээн тэрээр өөрийн нүүр номдоо бичжээ.
"Миний цуглуулсан хорвоо" ном тээсэн тэмээн жин арванхоёрдугаар сарын 6-ны өглөө нар мандахад Дорноговь аймгийн Сайншанд хотын Хамарын хийдээс хөдлөх юм байна. Улмаар арванхоёрдугаар сарын 8-ны өглөө А.Эрдэнэ-Очир найрагчийн төрсөн нутаг Дорноговь аймгийн Улаанбадрах суманд очих ажээ. Энэ үйл ажиллагааны хүрээнд "Найргийн гал" түүдэг тойрсон яруу найргийн уншлага, "Миний цуглуулсан хорвоо" үдшийн цэнгүүн Улаанбадрах суманд болох бөгөөд ном хүлээлгэж өгөх ёслол зохион байгуулагдах юм байна.
