АН-ынхан энэ долоо хоногийн эхээр шинэ Ерөнхий сайдаа томилох асуудлаа Ерөнхийлөгчтэй зөвшилцөхөөр төлөвлөжээ. Тиймээс УИХ дахь АН-ын бүлгийн дарга Д.Эрдэнэбат Ерөнхий сайд С.Батболдыг ИБУИНВУ-ын нийслэл Лондонд хийх айлчлалаа түр хойшлуулахыг хүсчээ. Түүний энэ хүсэлтийн хариуд Ерөнхий сайд С.Батболд 2012 оны зуны олимпод оролцож байгаа Монголын тамирчдаа дэмжихээр ИБУИНВУ-ын нийслэл Лондон хотод хийх айлчлалаа түр хугацаагаар хойшлууллаа. Айлчлалаа хойшлуулсан нь Ерөнхий сайдын хувьд Ерөнхийлөгчтэй биечлэн уулзаж, зөвшилцөж байж гаргасан шийдвэр бололтой. Мөн гүйцэтгэх засаглалын тэргүүн төр засгийг шинээр эмхлэн байгуулж улс төрийн намуудтай зөвшилцөх ажлыг шуурхайлахад Ерөнхий сайдын хувьд байлцах ёстой гэсэн шийдэлтэй нь бас холбоотой юм.
Ерөнхий сайд С.Батболд ИБУИНВУ-ын нийслэл Лондон хот руу айлчлах төлөвлөгөө нь хоёр сар орчмын өмнө төлөвлөж батлагдсан юм. Энэ нь Монгол Улсаар хязгаарлахгүй дэлхийн бусад орны төр, засгийн өндөрлөгүүд тодруулж хэлбэл, Ерөнхийлөгч нь олимпийн нээлтийн үйл ажиллагаанд оролцдог бол Ерөнхий сайд нь олимпийн хаалтын ажиллагаанд оролцож, тамирчдаа дэмжин, амжилтыг нь баталгаажуулж урам зориг өгч, улмаар олимпийн медальтнуудаа эх орондоо авч ирдэг эрхэм уламжлалт харилцаатай холбоотой юм.