Монгол Улсын ерөнхийлөгч асан Н.Энхбаярт шүүхээс ялласантай холбогдуулан “МАХН-МҮАН ШУДАРГА ЁС ЭВСЭЛ”-ээс мэдэгдэл гаргасан байна. Уг мэдэгдэлд:
     Монгол Улсын гурав дахь Ерөнхийлөгч, “МАХН-МҮАН ШУДАРГА ЁС ЭВСЭЛ”-ийн Тэргүүн Н.Энхбаярыг зохиомол хэргээр хилсдүүлэн ялалсантай болон МАХН-МҮАН Шудрага ёс эвслийн үйл ажиллагаа, нэр төрд харшлах, эвслээс улс төрийн тогтворгүй байдал үүсгэж буй мэт үндэслэлгүй худал мэдээлэл гарч байгаатай холбогдуулан дараах мэдэгдлийг хийж байна:  Үүнд:
1.    Хууль бус аргаар гэрч, шинжээчийн мэдүүлгүүд бүрдүүлж, нотлох баримтыг цуглуулан, нэхэмжлэгч, хохирогчгүй зохиомол хэргийг МАХН-ын дарга Н.Энхбаярт холбогдуулан үүсгэж, улмаар анхан шатны шүүхээс мэтгэлцээн хийх зарчмыг зөрчин, хэргийг тулган тасалсан нь Монгол Улсад хууль дээдлэх зарчим алдагдаж, шүүх засаглал улс төрийн хараат байгууллгага болсныг харуулж байна. Хүн бүр хуулийн өмнө тэгш байж, шударга шүүхээр шийдвэрлүүлэх тухай Үндсэн хуулиар баталгаажсан хүний эрх зөрчигдөж, улс төрийн хэлмэгдэлтийн аливаа үйлдэлтэй  цаашид ч  тууштай тэмцэх болно гэдгээ мэдэгдэж байна.

2.    МАХН-ын дарга  Н.Энхбаяртай холбогдолтой хэргийг хянан шийдвэрлэхдээ  хүний эрх, эрх чөлөөг хүндэтгэн, хууль ёсны дагуу үнэн зөв шийдвэрлэх нь  шударга ёсонд нийцнэ гэж үзэж байна.

3.    “МАХН-МҮАН ШУДАРГА ЁС ЭВСЭЛ” нь ард түмнийхээ сонголтоор төр барилцах үүрэг хүлээсэн хариуцлагатай улс төрийн хүчний хувьд нийгмийн шударга ёсыг тогтоож, баялагтаа эзэн суух нөхцлийг хангасан, ард иргэддээ үйлчилдэг сайн засаглалыг бэхжүүлэх үүргээ гүнээ ухамсарлан, цаашид Монголын төр, засгийг эмхлэн байгуулахад бусад улс төрийн хүчинтэй нягт хамтран ажиллах болно гэдгээ хариуцлагатай мэдэгдэж байна.  

“МАХН- МҮАН ШУДАРГА ЁС ЭВСЭЛ”-ИЙН УДИРДАХ ЗӨВЛӨЛ
гэжээ.