Тагнуулынхан УИХ-ын гишүүн асан Ц.Шинэбаярт эрүүгийн хэрэг үүсгэсэн нь олны анхаарал татаж буй. АТГ, цагдаагийнхныг дайчилж МАХН-ын дарга Н.Энхбаярыг одоогоос дөрвөн сарын өмнө баривчлах үеэр Ц.Шинэбаяр АТГ-ын албан хаагчийн биед халдан, цагдаагийнхны өөдөөс салаавч үзүүлж олон нийтийн өмнө ёс бус үйлдэл хийсэн. Тухайн үед цагдаагийнхан УИХ-ын гишүүн Ц.Шинэбаярт эрүүгийн хэрэг үүсгэхээр материал бүрдүүлсэн боловч түүнийг уучлал гуйсан гэсэн шалтгаанаар “гэмт хэрэгтэн” болгохоос татгалзсан юм. Харин АТГ-ын албан хаагч тодруулбал, Мөрдөн шалгах албаны дарга Э.Амарбатын биед халдаж, нүүр рүү нь хуруугаараа чичилсэн хэмээн прокурорын байгууллагад гомдол гаргасан гэнэ. Тиймээс прокурор Ц.Шинэбаярт холбогдох хэргийг Тагнуулын ерөнхий газраар шалгуулахаар харьяалал тогтоожээ.