АН-ын дарга Н.Алтанхуягийг өчигдөр Монгол Улсын 27 дахь Ерөнхий сайдаар томиллоо. Тэрээр Монгол Улсын Ерөнхий сайдаар томилогдоод чуулганы индэр дээрээс түүний удирдсан Засгийн газар Тогтолцоо тоглоомын дүрэм хоёрыг өөрчилнө гээд “Авлигын үнэр шингэж, ад хор шүглэсэн хэнийг ч болов Монголын төр хоймортоо байтугай хатавчинд ч суулгах ёсгүй. Ардчилсан Засаг Авлигын аранга байх болно” хэмээн ам бардам хэлэв.

 Ямартаа ч түүний удирдсан Засгийн газар төрд дөрлөгдсөн бус нийтэд зориулагдсан албыг бий болгож, байгууллага хэсүүлж, хаалга сахиулдаг чирэгдлийг нэг цонхонд төвлөрүүлж, иргэнээ захирдаг бус иргэндээ үйлчилдэг тунгалаг төрийн буй болгоно хэмээн маш товч бөгөөд тодорхой амлалт өглөө. Дөрвөн жил гэдэг төрийн ажилд тийм ч урт хугацаа яг үнэндээ биш. Гэхдээ хийе гэсэн зорилго дор нэгдэж чадвал бас урт хугацаа. Энэ удаад ёстой Засгийн гадна үлдсэн МАН-ын хэлснээр “динозаврын эвсэл”-ээс бүрдсэн Засгийн газар  буй болсон. Тиймээс юу л бол гэх эргэлзээ олон хүн төрүүлээд байгаа.
Тэгэхээр Монгол Улсын 26 дахь Ерөнхий сайдын хэлсэнчлэн санхүүгийн хямрал, зудын бэрхшээлийг амжилттай давсан, эдийн засгийн нэмэх 17 хувийн өсөлттэй, мал сүргээ 50 саяд хүргэсэн, хэрэгцээт буудай, төмсөө 100 хувь дотоодоосоо хангадаг болсон, эдийн засгийн шинэчлэлийг бодитойгоор эхлүүлсэн Засгийн газрыг хүлээж авсан Н.Алтанхуяг сайд дараагийн Ерөнхий сайддаа авлигаас ангижирсан тунгалаг Засгийн газрыг хүлээлгэн өгөх болтугай хэмээн ерөөн сууя.


Монгол Улсын 27 дахь Ерөнхий сайд Н.Алтанхуяг

Норовын Алтанхуяг нь Монголын Социал Демократ намын Нарийн бичгийн дарга, Ерөнхий нарийн бичгийн дарга, Монгол Улсын Их Хурлын гишүүн, Монгол Улсын Их Хурлын Аюулгүй байдал, гадаад бодлогын байнгын хорооны дарга, Монгол Улсын Засгийн газрын гишүүн, Хөдөө аж ахуй, үйлдвэрийн сайд, Сангийн сайд, Сонгинохайрхан дүүргийн Ардчилсан намын дарга, Ардчилсан намын Ерөнхий нарийн бичгийн дарга, Монгол Улсын Тэргүүн Шадар сайд,  Ардчилсан намын дарга зэрэг улс төрийн хариуцлагатай албан тушаалуудыг үр бүтээлтэй хашиж иржээ. Н.Алтанхуяг биофизикч, физикийн багш мэргэжилтэй. 1958 онд Увс аймгийн Улаангом суманд төрсөн, нохой жилтэй. Эхнэр хүүхдүүдийн хамт амьдардаг.