Монгол Улсын Их Хурлын гишүүн, Улсын Их Хурлын Дэд дарга, Засгийн Газрын гишүүн асан Ардчилсан Намын Дэд дарга, Төр нийгмийн зүтгэлтэн Гаваагийн Батхүү агсан Төрийн ордонд амь насаа алдсантай холбоотойгоор элдвийн таамаг хэвлэл, мэдээллийн хэрэгслээр явж байна. Түүнтэй хамгийн сүүлд уулзсан гэх УИХ-ын гишүүн Н.Номтойбаяр дөнгөж сая хэвлэлийнхэнд мэдээлэл өглөө.
Тэрбээр, “Долдугаар сарын 20-27-ны хооронд олон улсын авто раллигийн тэмцээн болох юм. Тэмцээнээс өмнө холбоотойгоо хамтарч хэвлэлийн хурал хийе гэдэг ажил хэрэгч яриа бид хоёрын дунд өрнөсөн. Уулзалт 15минут орчим үргэлжилсэн байх. Уулзах үед сэтгэл санааны хувьд зүгээр байсан. Нэлээд жин хассан нь ажиглагдсан. 2016 оны сонгуулиас хойш бид хоёр тааралдаагүй байсан юм. Мөн нүүрний судас нь нэлээд улаалттай байсан. Ах нь эмчилгээ хийлгэж байгаа гэдгээ хэлсэн. Тухайн үед ганцаараа явж байсан. Миний хувьд бүлгийн хурал руу 19:18 минутад орсон. Үүдэнд байсан сэтгүүлчид гэрчилнэ. Төрийн тусгай хамгаалалтынх нь ч байсан. Картын бүртгэлийн мэдээлэлд ч энэ цаг хугацаа бий. Миний хувьд өчигдөр очиж гэрчийн мэдүүлэг өгсөн.
Миний өрөөнөөс ганцаараа гарсан. Өрөөнд маань миний зөвлөх, талийгаач, бид гурав л байсан. Өөр хүн нэмж орж ирээгүй. Талийгаач өрөөнөөс гарсны дараа бид 3, 4 минутын дараа гараад бүлгийн хурал руу орсон. Гарахдаа ах нь яараад байна. Хүн хүлээж байгаа гэж хэлээд хуралдааны өмнө утсаар ярья гээд гарсан” гэв.
