УИХ-ын дэд дарга Ч.Улаантай ярилцлаа.
 Засгийн газрын бүтэц, бүрэлдэхүүний тухай хуулийн төслийг засварлах, эргэж харах юм байна гэж танай бүлгийнхэн үзэж ажлын хэсэг байгуулсан. Яг юуг нь засварлав?
 Давхцсан, орхигдсон юм байна. Оновчтой биш хуваарилагдсан ч асуудал байлаа. Энэ бүгдийг нэг бүрчлэнхэлэлцэж байна.
 Бүлгийн хуралдаанаар юу ярилцаж байна вэ?
 Шинээр байгуулагдаж байгаа Засгийн газарт орох сайд нарынхаа нэрийг ярилцаж байна. Мөн Засгийн газрын бүтцийн асуудлыг ярьж байна. Үүнийг шийдсэний дараа хуулийн дагуу Ерөнхий сайд эвсэл байгуулсан намуудтай ярилцаад Засгийн газрынхаа бүрэлдэхүүний талаар саналаа оруулж ирнэ. Тэр үед сайдын нэрс тодорхой болно.
 Агентлагийн тоог цөөлж байгаа нь олон мянган төрийн албан хаагчийн эрх ашгийг зөрчинө гэж үзэж байна. Энэ талаар танай бүлгийн байр суурь ямар байна вэ?
 Бүтцийн өөрчлөлтийн асуудал зөвхөн орон тоог цөөрүүлэх, хүмүүсийг халах солих зүйлийг агуулдаггүй. Хамгийн гол нь оновчтой бүтцээ бий болгох. Тэгээд чадварлаг үр ашигтай ажиллахаар төрийн албан хаагчдыг бүрдүүлдэг. Тиймээс оновчтой бүтцээ бий болгох чиглэл рүү энэ ажил хийгдэж байна. Түүнээс төчнөөн хүнийг хална, гудамжинд гаргана гэдэг нь дэндүү өнгөцхөн.
Танай бүлэг дөрвөн сайдын суудлыг чамласан гэсан яриа байна?
 Чамлалтай гэдэг нь зохимжтой биш. Ямар үүргийг хариуцах вэ, хэрхэн хариуцлага хүлээх вэ гэдэгт асуудал байгаа. Зөвхөн тоо талаас үзэхээр асуудал юуг ч хэлэхгүй. Тооны цаана агуулга байх ёстой. Тэгэхээр гурван яам, Шадар сайдын асуудлын цаана хариуцаж байгаа асуудлын цар хүрээ ямар байх вэ гэдэгт тодорхой санал дүгнэлт байна.