УИХ-ын гишүүн асан Ц.Батбаяраас товч тодруулга авлаа.
 
-Та Нийслэлийн МАН-ын хорооны даргад нэрээ дэвшүүлэх үү?
-Дэвшүүлнэ. УИХ болоод НИТХ-ын сонгуульд ялагдал хүлээсэн нь үнэн учраас Нийслэлийн МАН-ын хорооны дарга нарт хариуцлага тооцож, шинэ хүмүүсийг гаргаж ирэх ёстой.
-Та шинэ хүн болж чадах болов уу?
-Манай намд шинэчлэл ус агаар мэт үгүйлэгдэж байна. Шинэчлэл гэдэг зөвхөн нэг, хоёр хүн солих, огцруулах, шинээр томилох төдий өнгөц зүйл биш. Бид одоо л хариуцлага тооцож чаддаг болох ёстой. Манай нам хүндээ хариуцлага тооцож чаддаггүй. Алдаа гаргасан хүнээ нам нь улайран хамгаалдаг сул тал нь ялагдалд хүргэсэн.
-Яг хэнийг хэлээд байгаагаа тодруулахгүй юу?
-Ц.Нямдоржийг аль эрт огцруулах ёстой байтал нам улайран хамгаалсаар, сайдын суудалд нь авч үлдсэн биз дээ. Тэр нь манай намын нэр хүндийг унагасан. Намын даргыг ч бас “Та болохгүй байна аа, одоо огцор” гэж эртнээс сануулсан боловч хэн ч халгаагаагүй. Энэ ч бас МАН-ын ялагдлын том шалтгаан. МАН үнэхээр дотроосоо ялзарч байна шүү дээ. Шинэчлэл ярьсан хүмүүсээ доош нь дардаг, зөвхөн мөнгө хандивлаж, өөрт нь таалагдах гэж гүйсэн хүмүүсийг дээш нь гаргадаг зэрэг байж боломгүй алдаанууд нь сүүлдээ ил  явдаг болсон нь манай намыг ялагдалд хүргэсэн.
-Өмнө нь та хотын дарга бас нийслэлийн МАН-ын дарга байсан. Тэгэхээр МАН нийслэлд хамгийн том ялагдал хүлээсний бурууг хамтран үүрэх хүний нэг биш гэж үү?
-Намаа шүүмжилдэг, шинэ уур амьсгал, шинэ бодлого шаарддаг цөөхөн хүний нэг нь би шүү дээ.