Ерөнхий сайд Н.Алтанхуяг өчигдөр УИХ дахь МАХН-МҮАН-ын “Шударга ёс” эвслийн бүлгийн хуралдаанд оролцож, Засгийн газрын бүтцийн асуудлаар ярилцсан юм. Тэрээр бүлгийн хуралдаанаас гарч ирсний дараа сэтгүүлчдийн сонирхсон асуултад ийн хариуллаа.
 
-Засгийн газрын бүтцийн асуудлаар “Шударга ёс” эвслийнхэнтэй ярилцлаа. Санал нэгдэв үү?
-“Шударга ёс” эвслийн бүлгийн хуралд оролцож, хоёр, гурван цаг ярилцлаа. Засгийн газрын бүтэц, цаашид хийх гэж буй ажлын талаар ярилаа. Хамгийн гол нь, Засгийн газрын бүтэц бидний хийх гэж буй ажилтай уялдаж, зохицох учиртай. Санал нэгдэхгүй байгаа асуудал үндсэндээ алга. Ганц нэг агентлагийг хэнд харьяалуулах нь зүйтэй вэ гэдэгт санал гарсан. Бусад асуудлын тухай нэг бүрчлэн ярьж, тайлбарлаж, санал бодлоо солилцоод нэгдмэл саналд хүрч чадлаа. Өөрөөр хэлбэл, Ерөнхий сайдын өргөн барьсан Засгийн газрын бүтцийг “Шударга ёс” эвслийн бүлэг дэмжлээ. Зарим нэг агентлагийг хэнд харьяалуулах вэ гэдэгт дахиж ярина.

-Тухайлбал, аль агентлагийг вэ?
-Төрийн өмчийн хороо. Энэ байгууллага Ерөнхий сайдын харьяанд явж ирсэн. Бид ярилцаад Үйлдвэр хөдөө аж ахуйн яаманд шилжүүлье гэсэн санал гаргасан. Төрийн өмчийн хороонд улсын үйлдвэрийн газрууд багтдаг. “Шударга ёс” эвслийн бүлэг ч Төрийн өмчийн хороог цаашид өөрчлөх нь зүйтэй. Төрийн өмчийн баахан компани харьяалагддаг болохоор тухайн компанийн захирлыг тавих гэж янз бүрийн асуудал гардаг. Дараа нь төрийн өмчийг шамшигдуулсан, хээл хахууль, авлига гээд элдвийн асуудалд орооцолддог.
Ер нь, Төрийн өмчийн хороог задлаж, үүргийг нь Үйлдвэр хөдөө аж ахуйн яамнаас гадна бусад яам, газарт шилжүүлэх нь зүйтэй гэсэн санал гаргасан. Төрийн өмчийн хороог шинэчлэх, өөрчлөх тухай нэлээн удаан ярилцлаа. Өнөөдрийн Засгийн газрын бүтцээр Төрийн өмчийн хороо бусад газрыг шинэчилж, өөрчлөх тухай ярих боломжгүй.
Тиймээс аль нэг сайдад харьяалуулж бичээд Засгийн газраа байгуулж, дараа нь ингэж өөрчилнө гэсэн асуудлаа ярина. “Шударга ёс” эвслийн бүлэгтэй Төрийн өмчийн хороог өөрчилж, шинэчилнэ гэсэн асуудалд санал нэгдлээ.

-Төрийн өмчийн хороог хэнд харьяалуулахаар болов?
-“Шударга ёс” эвслийн бүлэг хуучнаар Ерөнхий сайдын эрхлэх асуудлын хүрээнд байлгах санал гаргасан. 

-Ерөнхий сайдын харьяанд ямар агентлагууд байх вэ. Өөрчлөлт оруулах уу?
-Ерөнхий сайдын эрхлэх асуудал хуучныхаараа. Дээр нь, бид газрын харилцааны асуудлыг Ерөнхий сайдын мэдэлд өгье гэж ярьсан. Тэгэхгүй бол хот, дүүрэг, аймаг сум бүгд л газар олгодог. Ингэж засаг захиргааны нэгжээр газар олгож буй нь маш их замбараагүй байна. Мөн салбаруудаар газар олгодог. Тухайлбал, Байгаль орчны яам тусгай хамгаалалттай болон бусад хэлбэрээр газар олгож байгаа. Эрдэс баялаг эрчим хүчний яам ашигт малтмалын ашиглалт, хайгуулын лиценз нэрээр газар олгодог. Хөдөө аж ахуйн яам болохоор эдэлбэр газар, газар тариалангийн газар олгоно. Энэ мэтчилэнгээр манай улсад газрын бодлого алдагджээ.
Тиймээс бодлогынх нь асуудлыг Ерөнхий сайд зангидсан нь зүйтэй гэж үзэж байгаа.
“Шударга ёс” эвсэл газартай адилхан усны бодлого алдагдсан учир усыг ч Ерөнхий сайдад харьяалуулах нь зүйтэй гэсэн санал гаргалаа. Нэг нь газар тариалангийн ус ярьж байхад нөгөө нь ундны ус ярьдаг. Тиймээс усны бодлогын асуудлыг Ерөнхий сайдад харьяалуулж, энэ чиглэлээр шинэчлэл өөрчлөлт хийх нь зүйтэй. Ерөнхий сайдад харьяалуулна гэхээр Ерөнхий сайд газар олгоно гэсэн үг биш шүү. Тэгж ойлгох вий. Устай холбоотой бүх асуудлыг Ерөнхий сайд шийдвэрлэнэ гэсэн үг ч биш. Газар, устай холбоотой бодлогын асуудлыг нэг мөр болгож, монголчуудад ойлгомжтой болгоё л гэж байгаа юм.

-Засгийн газрын өргөн барьсан бүтцэд өөрчлөлт оруулах тухай өөр санал гарсан уу?
-Өргөн барьсан бүтэц дээр нэг зүйлийг өөрчилье гэж “Шударга ёс” бүлгийнхэн ярилаа. Одоо бүх төрлийн тендерийг яам, агентлагууд аравдугаар сарын  1-нээс зарлахаа болино. Бүх тендерийг зарладаг нэг агентлагтай болж байгаа юм. Энэ агентлагийг Ерөнхий сайдын харьяанд байлгахаар тусгасан л даа. Гэтэл “Шударга ёс” эвслийн бүлэг үүнийг Шадар сайдын харьяанд өгье гэсэн санал гаргаж байна. Тэгье л гэлээ. Тендертэй ноцолдоод сууж байдаг Ерөнхий сайд гэж юу байх вэ. Бусад газрын бодлоготой л зууралдсан нь дээр гэж үзэж байна.

-Засгийн газрын бүтцийн асуудал хэдийд тодорхой болж Байнгын хороо, УИХ-ын чуулганы хуралдаанаар оруулах боломжтой болох бол?
-Ардын намын гишүүдтэй уулзана. Тэдэнд Засгийн газрын бүтцээ танилцуулж, ярилцана. АН бүлэг өчигдөр /уржигдар/ хуралдаад дэмжсэн. “Шударга ёс” бүлэг ч саналаа хэлчихлээ. Ардын намын гишүүд юу гэж хэлэхийг нь сонсъё. Ингээд Төрийн байгуулалтын байнгын хорооны хуралдаанд Засгийн газрын бүтцийн асуудлаа оруулна. Хуралдаанаар оруулах өөрчлөлтүүдээ ярилцаад УИХ-ын чуулганаар оруулна.  
     
-Сайд нарын нэр тодорхой болсон уу?
-Засгийн газрын бүтэц батлагдсаны дараа аль яамны сайд хэн байх вэ гэдгийг Ерөнхийлөгчтэй, “Шударга ёс” эвслийн бүлэг, ИЗНН-ынхантай зөвшилцөнө.  Ерөнхийлөгчтэй зөвлөлдөөд УИХ-д тэр салбарын сайдаар тэрийг дэвшүүлнэ гэдгээ бичгээр дахин өргөн мэдүүлнэ.