МАХН-ын дарга, Ерөнхийлөгч асан Н.Энхбаярын өмгөөлөгч С.Нарангэрэлтэй өнгөрсөн баасан гарагт цөөн хором ярилцсанаа хүргэе.

-Та Н.Энхбаяр даргатай уулзсан уу. Бие нь ямар байна вэ?
-Өчигдөр үдээш хойш   /пүрэв гарагт/ очиж уулзсан. Давж заалдахаар бичсэн гомд­лоо өглөө. Бие нь муу байна. Хо­рих ангийн удирдлагууд ч сандарсан, мэргэжлийн эмч нар авчирсан байгаа харагдсан.

-Ухаан алдаж унасан гэдэг үнэн үү. Юунаас болсон гэнэ?
-Үнэн юм билээ. Өмнө нь бүхэл бүтэн 11 хоног өлсгөлөн зарласан хүн шүү дээ. Бие нь сайн тэнхрээгүй, дархлаа нь сайн сэргэж амжаагүй байсан. Шүүх хуралд анхаарлаа хандуулах гээд тайван амарч ч чадаагүй. Даргын хувьд шүүхэд их итгэж байсан, ингэж харгис хандана гэж ч бодоогүй. Сүхбаатар дүүргийн шүүх бусдыг хилс хэргээр шийтгэж, залхаан цээрлүүлдэг шүүх болж хувирчээ.

-Н.Энхбаярыг дахин өлсгөлөн зарлаж магадгүй гэсэн мэдээлэл байна. Энэ тухайд...?
-Надтай уулзахад “Би дахин өлсгөлөн зарлавал яах бол” гэж асуусан. “Тийм зүйл дахиж битгий л хийгээрэй. Эрүүл мэнд, амь насаа бодоорой” гэж гуйлаа. Дараагийн шатны шүүх анхан шатны шүүхийн шийдвэрийг залруулна байх. 

-Сүхбаатар дүүргийн шүүхийн шийтгэх тогтоолд давж заалдах гомдол гаргахдаа юуг илүү онцолж дурдсан бэ?
-Сүхбаатар дүүргийн шүүх хоёр хоногийн өмнө 326 тоот шийтгэх тогтоолыг шүүгдэгч болон өмгөөлөгч нарт өгсөн. Гурав хоногийн турш болсон шүүх хурлын үйл явцаас харахад, шүүх Эрүүгийн байцаан шийтгэх хуулийн шүүх хурал мэтгэлцэх явагдана гэсэн заалтыг зөрчлөө. Эрүүгийн хуулийн зүйл ангийг буруу хэрэглэсэн. Тухайлбал, Н.Энхбаярт 150.3-т зааснаар ял оноосон нь буруу. Өмгөөлөгч эсрэг болон цагаатгах мэдүүлэг өгсөн 16 гэрчийг шүүх хуралд оролцуулахыг хүссэн. Гэвч шүүх энэ хүсэлтийг хүлээж аваагүй. Зөвхөн яллах талын баримтуудыг уншсан. Үүнийгээ нотлох баримтыг шинэчлэн судаллаа гэж үзлээ. Шүүгчид нотлох баримтыг үнэлэх, үнэнийг тогтоох гэж ажиллагаа хийсэнгүй. Угаасаа л шүүгчид Н.Энхбаярыг гэмт хэрэгтэн болгоно, олон жилээр хорих ял онооно гэсэн л бодолтой танхимд орж ирсэн нь илт байсан шүү дээ. Шийтгэх тогтоолоо урьдчилаад бэлтгэчихсэн байсан. Тиймээс шийтгэх тогтоол хууль бус, үндэслэлгүй гэж үзэж байна. Н.Энхбаярыг буруутгасан дөрвөн үндэслэл зохиомол. Үүнийг хөдлөшгүй баримтаар няцаана. 50 хуудас бүхий шийтгэх тогтоолд 10 хуудас давж заалдах гомдол бичсэн. Нийслэлийн шүүхэд бас нэг асуудал тавих гэж байгаа.

-Юун тухай?
-Давж заалдах гомдол гаргаснаас хойш шүүгч 30 хоногийн дотор хавтаст хэрэгтэй танилцаж, шүүх хурлын тов зарладаг. Энэ хугацааг шүүхийнхэн ажлын хоногоор тооцдог юм. Тэгэхээр 45 хоног болно. Н.Энхбаяр даргын хувьд гэм буруугүй. Тиймээс түүнийг нэг өдөр ч хориулмааргүй байна. Тиймээс энэ хугацааг наашлуулж өгөөч гэж хүсэлт өгнө.

-Шүүх Н.Энхбаяр даргыг зохиомол хэргээр ялласан гэлээ. Тэгвэл АТГ, прокурорын байгууллагыг ч хуулийн хүрээнд ажиллаагүй гэж үзэж байгаа хэрэг үү?
-Хамгийн гол нь, шүүх хурал мэтгэлцээний зарчмаар явагдаагүй. Ингээгүйгээс цагаатгах талын нотлох баримт ил тод биш болсон. Шүүх нотлох баримтыг анхааралтай ажиглах ёстой байтал Н.Энхбаяр даргыг улс төрийн захиалгатайгаар, зохиомол хэргээр яллалаа. Зохиомол хэргийн зохиогч нь ХЗДХ-ийн сайд Ц.Нямдорж.