УИХ дахь МАН-ын гишүүд Төрийн ордонд хуралдаж дуусаад сэтгүүлчдэд мэдээлэл хийлээ. Гишүүдийн хуралдаанаараа тэд УИХ-ын анхдугаар чуулганыг хаахаас өмнө МАН-ын бүлгийн асуудлыг шийдэх, Өвөрхангай аймгаас УИХ-д нэр дэвшиж олонхийн санал авсан С.Чинзориг, Ш.Төмөрхүү нарын талаар УИХ байр сууриа илэрхийлэх ёстой гэж үзсэн байна. МАН-ын гишүүд өчигдөр УИХ-ын чуулганы нэгдсэн хуралдааныг орхин гарсныхаа дараа мэдэгдэл гаргаж “УИХ-ын даргыг шинээр сонгохдоо АН УИХ-д суудалтай бүх намтай зөвшилцөх хуулийн заалтыг үл хэрэгсэн хүч түрэн шийдвэрлэсэн нь Парламентын ардчилал, нэгэнт тогтсон соёлыг уландаа гишгэсэн үйлдэл боллоо. УИХ дахь АН-ын удирдлага УИХ-ын даргыг өөрийн намын эрх ашгийг хамгаалагч, Парламент дахь олонхи, цөөнхийн ашиг сонирхлыг зохицуулах бус хооронд нь сөргөлдүүлэгч болгон хувиргасан нь улс төрийн балмад үйлдлүүдээс нь бэлхнээ харагдаж байна” гэсэн юм.
МАН-аас нэр дэвшиж УИХ-д сонгогдсон гишүүд УИХ-ын анхдугаар чуулган эхэлснээс хойш үндсэндээ парламентын үйл ажиллагаанд оролцолгүй өнөө хүрч байгаа юм.