УИХ-ын Тамгын газрын ерөнхий нарийн бичгийн дарга Ц.Шаравдоржоос МАН-ынхан анхдугаар чуулганаас завсарлага авч байгаа нь хууль ёсных эсэхийг тодрууллаа.

-УИХ-ын анхдугаар чуул­ганд МАН-ын гишүүд суу­сангүй. Тэд манай намын бүлэг завсарлага авч байна гэх юм. Үүнийг нь албан ёсоор завсарлага авсан гэж ойлгож болох уу?
-УИХ-ын дарга үүнд маш тодорхой тайлбар өгсөн шүү дээ. МАН-ынхан хуульд заасан хугацаанд намын бүлгээ байгуулаагүй ээ гэж. Тиймээс МАН-ынхан УИХ-д бүлэггүй. УИХ-д бүлэг байгуулсан тохиолдолд  л чуулганы хуралдаанаас завсарлага авах эрхтэй байдаг. Ингэхээр МАН-ынхан анхдугаар чуулганаас завсарлага авлаа гэж хэлсэн нь хууль ёсных биш.
-УИХ-ын гишүүдийн хувьд чуулганы хуралдаанд оролцох нь тэдний хийх ёстой ажил гэж ойлгож байна. Ингэхээр МАН-ын гишүүдийг ажлаа тасалж байна гэж ойлгож болох уу?
-УИХ-ын гишүүн хууль батлах үүрэгтэй. Үүнийгээ хэрэгжүүлэхийн тулд мэдээж хэрэг чуулганы хуралдаанд суух л ёстой. Хуульд заасны дагуу завсарлага аваагүй болохоор ажлаа тасалж байна л гэж ойлгож болох байх аа.
-Жирийн иргэдийг ажлаа тасалсан тохиолдолд торгох ч юм уу захиргааны арга хэмжээ авдаг. Тэгвэл УИХ-ын гишүүдийн хувьд үүрэгт ажлаа хийхгүй байгаа ийм тохиолдолд хүлээлгэх хариуцлага гэж байх уу?
-Байхгүй ээ.