Монгол Улсаас ОХУ-ын Улаан-Үүд хотод суугаа Ерөнхий консулын газар Буриадын Шуурхай штаб /Буриадын яамдын төлөөлөл оролцсон/-тай өчигдөр орой видео хурал хийж, хоёр улсын хилээр Монгол иргэд, оюутан, сурагчдыг хэрхэн нэвтрүүлэх, тээвэрлэх, халдвар аюулгүй байдлыг хангах зэрэг асуудлаар ярилцсан байна. Буриадын боловсролын яам манай оюутан, сурагчдыг тээвэрлэх, аян замын хуурай хүнс, усаар хангахаар болж, бусад хотоос ирэх монгол иргэдийг зөвхөн улсын хил нээх хоёр өдөр саадгүй нэвтрүүлэх, сэжигтэй тохиолдол гарвал тусгаарлахаар болжээ. Эрхүүгээс Наушигт ирсэн иргэдийг Хиагт боомт хүртэл тээвэрлэх асуудлыг Ерөнхий консулын газрын саналын дагуу шийдсэн байна. Бусад иргэд өөрсдөө хувийн болон Улаан-Үдийн авто вокзал дээрээс шугамын автобусаар зорчихоор тохиролцжээ.