Олон улсын “Чингис хаан” нисэх буудалд тэсрэх бөмбөг байршуулсан байж
магадгүй гэсэн үнэн худал нь мэдэгдэхгүй мэдээлэл тараад хэдэн цаг болсны дараа тус нисэх буудлын дарга Л.Бямбасүрэн албан ёсны мэдээлэл өглөө. Түүний хэлснээр нисэх буудлаас сэжиг бүхий зүйл олдсон нь үнэн бөгөөд мэргэжлийн байгууллагууд одоо шалгаж байгаа юм байна.
“Чингис хаан” нисэх буудлын дарга Л.Бямбасүрэн ийн мэдээллээ. “Өнөө өглөө 06.05 минутад зорчигчдын хүлээлгийн танхимаас сэжиг бүхий, дуу чимээ их гаргах зүйл илэрсэн. Тиймээс энэ тухай холбогдох газруудад нь мэдээлж,  Хил хамгаалах ерөнхий газар, Тагнуулын ерөнхий газар, Цагдаагийн ерөнхий газар, Онцгой байдлын ерөнхий газар, Иргэний нисэхээс томилогдсон комисс хамтран шалгаж байна. Одоогоор дүгнэлт гараагүй, шалгаж байна. Энэ сэжиг бүхий зүйлийг хэн, ямар зорилгоор, хэзээ оруулж ирснийг тогтоохоор ажиллаж байна. Энэ тухай эргээд мэдээлнэ” гэлээ.