Шинэчлэлийн Засгийн газар өнгөрсөн хоногийн бямба гарагийн морин цагт үүдээ нээлээ. Энэ Засгийн газар өмнөх гүйцэтгэх засаглалаас тэс өөр зарчмаар ажиллана гэдгээ зарласан. Тиймдээ ч “Шинэчлэл” гэсэн үгийг өмчилж аваад буй. Үнэхээр ирэх дөрвөн жилд хамтарсан Засгийн газраас иргэд юуг хамгийн ихээр хүлээж байгаа вэ. Оюу толгойн хөрөнгө оруулалтын гэрээг монголчуудад ашигтай байдлаар шийдэх. Тодруулбал, Монголын талын эзэмших хувийг 51 хувьд хүргэнэ гэж найдаж буй. Түүнчлэн уул уурхайн бүтээгдэхүүнээ ганц гарцаар бус олон оронд экспортлох гарцыг нээх. Ингэхийн тулд шинэ төмөр зам барих ажлыг яаралтай эхлүүлэх. Ингэснээр Монголын байгалийн баялаг үнэгүйдэхэд хүрээд байгаа энэ байдлаас гарах учиртай. Мөн нефть боловсруулах үйлдвэр барьж ашиглалтад оруулах, “100 мянган айл” орон сууц хөтөлбөрөө үргэлжлүүлэх гээд өмнөх Засгийн газрын үед АН-ынхны санаачилж байсан ажлуудаа хийнэ гэж иргэд шинэчлэгчдээс хүлээж буй. Харин шинэчлэлийн Засгийн газрын эхний ажил иргэдэд нээлттэй засаг байгуулахаас эхэллээ. “Төрийн ёслол хүндэтгэлийн өргөө цогцолбор”-той иргэд танилцах боломжтой болсон. Энэ нь шинэчлэлийн Засгийн газар иргэдэд нээлттэй байх эхлэлийг тавьж байгаа. Иргэдэд нээлттэй байх Зас­гийн газар харин төрийн ал­ба­ныханд халгаатай байх аж. Энэ нь Засгийн газрын эх­ний хуралдааны гаргасан шийдвэрээс харагдав. Төрийн албан хаагчдын интернэтийн хэрэглээг хязгаарласан шийд­вэр гаргаж. Ингэхдээ Төрийн ордноос бусад газар интернэт хэрэглэхийг хориглов. Шинэ Засгийн газрын эл шийдвэр иргэдээс ирдэг гомдлоос үүдэлтэй байх гэж харж болохоор. Учир нь, төрийн албаныхан хүнд сурталтай, урдах ажлаа хийхгүй байж мессенжердээд сууж байдаг гэж шүүмжилдэг. Энэ ч үнэний ортой. Иргэдийн энэ үг төрд хүрч ийм шийдвэр гаргасан бололтой.

Ийнхүү Засгийн газар эхний хурал­даанаараа л төрийн алба­ныхны эрх ямбанд халд­сан шийдвэр гаргаад эхэл­лээ. Дараа дараагийн хурал­даанаар ч төрийн албаныханд чиглэсэн асуудал хэлэлцэхийг хэн байг гэхэв. Ер нь, тэгээд шинэчлэгчид Засгийн газрын бүтцээ байгуулсан цагаас эхэлж сайд нарт өндөр шаардлага тавьж эхэлсэн. Засгийн газарт орж ажиллах сайд нар өдрийн 12-оос дээш цаг ажиллахаас гадна долоо хоногт амралтын өдөргүй байх ам тангараг өгсөн. Мэдээж хэрэг, сайд ажиллаж байхад сайдын харьяанд үүрэг гүйцэтгэж буй хүмүүс ч гэсэн энэ л зарчмаар ажиллана. Ингэж сайд нар амралтын өдөргүй ажиллаж байгаагийн цаана АН төрд гарснаар ажлын зургаан өдөрт шилжих шийдвэр гаргаж мэднэ гэсэн хардлага төрүүлэх болов. Зарим нэг сайд үүнийг ч үгүйсгээгүй. Ер нь бол улсаа хөгжүүлье л гэж бодож байгаа бол хүн бүр амралтаа хойш тавьж, хөдөлмөрлөх ёстой гэсэн зарчмыг АН-ынхан баримталж буй. Үүгээрээ тэд өмнөх Засгийн газраас ялгарна.
 
Тэдний өмнөхөөсөө ял­га­рах зүйл үүгээр зогсохгүй гэнэ. Төрийн албыг чанаржуулж, цомхон бүтэцтэй болгох, авлигаас ангид нийгмийг байгуулах аж. Үүнээс гадна ажил хийхгүй хүнд зүгээр л мөнгө өгөөд байдаг өмнөх Засгийн алдааг давтахгүй. Зөвхөн зорилтот бүлэгт  ха­лам­жийн бодлогоо чиглүүлнэ гэд­гээ зарласан. Ажил хийсэн нэгэн нь хохирч, ажилгүй суу­сан хүн хождог тэр цаг ард үлдэж. Шинэчлэгчээс ард түмэн ийм олон зүйлийг хүсэн хүлээж байна. Ажиллаад байгаарай шинэчлэгчид ээ.