ОБЕГ-ын дарга асан П.Даш, тус газрын Улсын нөөц бүрдүүлэлтийн газрын дарга Л.Алтангэрэл нар Нийслэлийн шүүхэд давж заалдах гомдол гаргажээ.
Чингэлтэй дүүргийн шүүх өнгөрсөн сард тэдэнд холбогдох хэргийг хэлэлцээд тус бүрт нь гурван жил зургаан сар хорих ял оноосон юм. Тэднийг албан тушаал, эрх мэдлээ урвуулан тус газрын барилгын их засварын ажлыг тендергүйгээр, Төрийн өмчийн хорооны зөвшөөрөлгүйгээр хийж гүйцэтгүүлэн улсад их хэмжээний хохирол учруулсан. Мөн тендер зарлахгүйгээр автомашин худалдан авч улсын төсөвт 500 гаруй сая төгрөгийн хохирол учруулсан хэрэгт буруутгасан юм. Тиймээс тэд анхан шатны шүүх хууль бус шийдвэр гаргаж, хилс хэргээр яллалаа хэмээн давж заалдах шатны шүүхэд гомдол гаргасан аж.
Яллагдагч нарт холбогдох хэргийг өнгөрсөн оны есдүгээр сард Хан-Уул дүүргийн шүүх хэлэлцэж, П.Дашид дөрвөн жил зургаан сар, Л.Алтангэрэлд гурван жил зургаан сар хорих ял оноож, Өршөөл үзүүлэх тухай хуульд хамруулж байсан удаатай.