УИХ дахь МАН-ын гишүүд энэ удаагийн хуралдаанаараа Орон нутгийн сонгуулийн тухай хуулийн төслийг хэлэлцсэн байна. Орон нутгийн сонгуулийн тухай хуулийн төслийг Ардчилсан нам, ИЗНН, “Шударга ёс” эвсэл хамтран санаачилж, өнгөрсөн долоо хоногт УИХ-ын даргад өргөн мэдүүлсэн. Төсөлд орон нутгийн ИТХ-ын төлөөлөгчийн гуравны нэг хүртэлхийг намын жагсаалтаар үлдсэн төлөөлөгч тойргийн системээр өрсөлдөхөөр заагаад байгаа.

Харин МАН-ын гишүүд орон нутгийн ИТХ-ын төлөөлөгчийг сонгохдоо гуравны нэг хүртэлхийг намын листээр сонгох нь буруу, энэ бол улстөржсөн, намчирхсан түүнээс харьяат байлгах гэсэн маш буруу алхам гэж үзжээ. Түүнчлэн Үндсэн хуулийг зөрчсөн гэлээ.
Мөн орон нутгийн сонгуульд сонгогч саналаа өгөөгүй бол төрийн албанаас чөлөөлж дараагийн сонгуульд саналаа өгвөл ажилд нь эргүүлэн томилох гэх заалт ч ороод байгаа. Энэ бүхэн бол хүний эрх зөрчсөн үйлдэл болно гэдгийг УИХ-ын гишүүн Н.Энхболд хэллээ.
Орон нутгийн тухай хууль санаачлагчдын үзэж буйгаар эл сонгуулийг арваннэгдүгээр сард явуулахаар товлож буй гэх. Тэгвэл үүнийг УИХ-ын гишүүн Д.Лүндээжанцан боломжгүй гэлээ. Учир нь малчид өвөлжөөндөө буудаг, отор нүүдэл хийдэгтэй холбоотой гэж тайлбарлав.

Мөн УИХ-ын гишүүн С.Бямбацогт “МАН-ын 25 гишүүн УИХ-д сонгогчоо төлөөлөн сууж байгаа. Үндсэн хуулийнхаа зарчмаар бүлэг байгуулагдсан ч хүлээн зөвшөөрөхгүй байна. Мөн С.Дэмбэрэл, Ц.Цолмон нарын санаачилсан УИХын тухай хуульд нэмэлт өөрчлөлт оруулах тухай хуулийг ээлжит бус чуулганаар хэлэлцэхгүй юм байна” хэмээсэн юм.