Салаав. Энэ үйлдэл ч гэх үү, үг ч гэх үү нэгнийгээ доромжилсон зүйл сүүлийн үед газар авлаа. УИХ-ын чуулганы танхимд үүнийг УИХ-ын гишүүн асан Ш.Сайхансамбуу эхлүүлсэн гэх. Гэхдээ энэ бол ойрын үед шүү дээ, үүнээс өмнө байсан эсэхийг би мэдэхгүй.
Түүнээс хойш салаавч тун олон гарлаа. Товчхондоо таван хурууныхаа нэгнийг хоёр хурууныхаа голоор чихэх үйлдлийг манайхан өдөр бүр хийдэг болж. Монгол Улсын Ерөнхийлөгчөөр ажиллаж байсан Н.Энхбаяр хүртэл ямар балмад байдлаар салаавч гаргаж, тагнуул, цагдаагийнхны өөдөөс гаргаж байсныг бид мэднэ. Мөн УИХ-ын гишүүн Ц.Шинэбаяр бас л цагдаагийнхны өөдөөс салаавч гаргасныхаа төлөө ТЕГ-т шалгагдаж байгаа юм. Уг нь, ТЕГ-ынхан үндэсний аюулгүй байдалд нөлөөлсөн зүйлийг шалгадаг дүрэмтэй юм билээ. Гэтэл Ц.Шинэбаярын гаргасан салаавч Монгол Улсын Үндэсний аюулгүй байдалд нөлөөлөхүйц салаавч гаргасан бололтой. Тэгвэл чуулганы хуралдааны танхимд УИХ-ын гишүүн Г.Баярсайхан дахин салаавч гаргав. Үүнийхээ төлөө УИХ-ын гишүүн У.Хүрэлсүхээс ухамсарын шанаа авсныг бид нүдээрээ харлаа. Энэ асуудлаас болж цахим хуудсаар У.Хүрэлсүхийн зөв, Г.Баярсайханы зөв гэхчлэн маргаж, хэрүүл хийж байна. Тэгвэл яг үнэндээ овоо босгоогүй бол шаазгай юунд суухав гэгчээр эрүүгийн хууль зүйл заалтгүй ч бүгдээрээ эсэргүүцэж, дургүйцдэг болсон салаавч гаргаагүй бол юунд шанаа авав гэж дээ.