Монгол Улсын Ерөнхийлөгч Ц.Элбэгдорж Эвсэлд үл нэгдэх орнуудын хөдөлгөөний дээд хэмжээний чуулганд оролцох үеэрээ НҮБ-ын Ерөнхий нарийн бичгийн дарга Бан Ги Мүнтэй уулзсан. Уулзалтын үеэр ноён Бан Ги Мүн манай улсад баяр хүргэхээр олон сайшаалтай зүйл байгааг онцлон дурдсаны дотор Ерөнхийлөгч Ц.Элбэгдоржийг авлигын эсрэг тууштай тэмцэж буйг магтжээ. Тэрээр хэлэхдээ “Авлигын эсрэг хүний эрх, хууль ёсыг дээдлэн тууштай тэмцэж байгаад тань мөн баяр хүргэе. Авлигатай тэмцэнэ гэдэг хэцүү гэдгийг солонгос хүний хувьд сайн ойлгож байна. Бүгд Найрамдах Солонгос Улс хоёр ч Ерөнхийлөгчөө авлигын хэргээр шоронд суулгасан. Хүүхдүүд нь бас яллагдсан. Одоогийн Ерөнхийлөгчийн ах бас авлигын хэргээр шоронд сууж байгаа шүү дээ” хэмээн өөрийнхөө улсаар жишээ аван ярьжээ. Энэхүү жишээндээ БНСУ ч төрийн тэргүүн байсан хүнээ ялгаагүй шоронд хийсэн гэдгийг онцгойлон дурдсан нь манай экс Ерөнхийлөгчийн хэргийг шүүхээр шийдэж, ял оноосонтой харьцуулсан бололтой. Гэхдээ ингэж хууль шүүх хэн бүхэнд ялгаагүй үйлчилж байгаа нь сайн хэрэг хэмээн Ц.Элбэгдорж Ерөнхийлөгчийг магтсаныг бодоход Н.Энхбаярын хэрэгт шүүхээс ял оноосныг зөв хэмээн үзэж буй бололтой.