“Петрочайна Дачин Тамсаг” компанийн ажилчид цалингаа нэмүүлэхээр удирдлагууддаа шаардлага тавьжээ. Хэрэв энэ сарын 15-ны дотор тэдний цалинг нэмэхгүй бол ажил хаяна гэдгээ ч мэдэгдлээ. Тус компанийн ажилчдын хэлснээр сүүлийн таван жилд тэдний цалинг нэмээгүй гэнэ. Тэд дөрвөн сарын өмнө энэ тухай удирдлагууддаа шаардлага тавьсан боловч одоо болтол биелүүлээгүй байна. Хэрэв энэ удаа тавьсан шаардлагыг нь биелүүлэхгүй бол Монгол Улсын хилээр нэг ч литр газрын тос гаргахгүй. Үүнээс үүдэх асуудлыг ч компанийн удирдлага хариуцах учиртайг хэвлэлийнхэнд хандсан ажилчид нь хэлсэн юм.
 “Петрочайна Дачин Тамсаг” нь Хятадын 100 хувийн хөрөнгө оруулалттай компани. Манай улсын Засгийн газартай бүтээгдэхүүн хуваах гэрээ байгуулж, Дорнод аймгийн Матад суманд газрын тосны олборлодог. 300 гаруй ажилчинтай. Өдөрт 10 мянган баррель нефть олборлож, дэлхийн зах зээлд нийлүүлдэг ч ажилтнуудынхаа цалин, хангамжид анхаарал хандуулдаггүй гэнэ.