УИХ дахь Ардчилсан намын бүлэг хуралдаж, 2012 оны Төсвийн тодотгол, Орон нутгийн сонгуулийн тухай хуулийн төсөл болон бусад асуудлыг хэлэлцсэн тухай бүлгийн дарга Д.Эрдэнэбат хэллээ. Тэрээр, “Төсвийн тодотголыг ирэх долоо хоногт УИХ-ын чуулганы нэгдсэн хуралдаанаар хэлэлцэх гэж байгаатай холбогдуулан Сангийн сайд Ч.Улаан 2012 оны төсвийн тодотголыг бүлэгт танилцууллаа. Үүнээс зарим зүйл эргэн харах хэрэгтэй байна гэж манай бүлгийн гишүүд үзсэн. Тухайлбал, АН-аас санаачилсан хүүхдэд сар бүр өгөх 20 мянган төгрөгийг ирэх аравдугаар сараас эхлэн олгохоор болсон. Үүнийг өгөхийн тулд төсвийн орлогыг нэмэгдүүлэх ёстой. Төсвийн орлогыг нэмэгдүүлэхийн тулд архи, тамхины онцгой албан татварыг нэмэгдүүлэх нь зөв гэж бүлгийн гишүүд дэмжиж, Сангийн яаманд чиглэл өглөө” гэв. Мөн АН дахь эмэгтэй гишүүд бүлгийн хуралд хэд хэдэн санал гаргажээ. Эмэгтэй гишүүдийн санааг зовоож байгаа асуудлын нэг нь цэцэрлэгийн хүүхдүүдийн хоолны чанарын асуудал аж. Өнөөдрийн байдлаар цэцэрлэгийн хүүхэд өдөрт 1100 төгрөгийн хоол иддэг аж. Энэ нь чанартай хоол унд хэрэглэхэд хангалттай мөнгө биш учир үүнийг нэмэгдүүлж өгөхийг Сангийн сайдаас хүссэн байна. Түүнчлэн ерөнхий боловсролын сурагчдын сурах бичгийг үнэгүй тараах нь учир дутагдалтай байгааг ч тэд бүлгийн хуралдаанд илэрхийлжээ.
Мөн сүүлийн үед УИХ дахь бүлгүүдийн хооронд хэрүүлийн алим болоод байгаа зүйл нь Орон нутгийн сонгуулийн тухай хууль. АН-ын бүлгийн хувьд УИХ-ын гишүүн Р.Бурмаа нарын өргөн бариад байгаа холимог тогтолцоогоор явуулахыг дэмжиж байгаа гэдгээ илэрхийллээ.