Жил бүрийн есдүгээр сарын 3 дахь долоо хоногийн бямба гарагийг Номын баярын өдөр болгох тухай зарлиг Монгол Улсын Ерөнхийлөгч гаргасан. Түүний энэ зарлигийг олон аж ахуйн нэгж байгууллага дэмжихээ илэрхийлжээ. Мөн тэд өөрсдийн санаачилгуудаа ирүүлсэн байна. Үүнийг нь Ерөнхийлөгчийн Тамгын газар дэмжиж Соёл, спорт, аялал жуулчлалын яам, Боловсрол, шинжлэх ухааны яам, Нийслэлийн Засаг даргын тамгын газар, ШУА, МҮОНРТВ, Үндэсний номын сан, Гандантэгчинлэн хийд, “Олуулаа” клуб, “Номын соёлт ертөнц” ТББ-ын төлөөлөгчидтэй уулзаж Номын баярын өдөр тэмдэглэх ажлын хэсэг байгуулжээ. Ажлын хэсэг хэд хэдэн ажил хамтран зохион байгуулахаар болсон байна.