Оюутолгойн хөрөнгө оруулалтын гэрээг УИХ-аар баталсан 57 дугаат тогтоолтой нийцүүлэх шаардлагатай байна гэж УИХ-ын зарим гишүүн өнөөдөр байр сууриа илэрхийллээ. УИХ-ын гишүүн Б.Бат-Эрдэнэ, Ц.Даваасүрэн, Г.Уянга, С.Ганбаатар тэргүүтэй гишүүд энэ асуудлаар Ерөнхий сайд Н.Алтанхуягт шаардлага хүргүүлж хариуг ирэх сарын 5-ны дотор авна гэдгээ мэдэгдлээ. УИХ-аас баталсан 57 дугаар тогтоолд эрх зүйн орчинг бүрдүүлэх замаар анхны хөрөнгө оруулалтыг нөхсөний дараа төрийн эзэмшлийн хувьцааны хэмжээг 50-иас доошгүй хувьд хүргэж нэмэгдүүлэх асуудлыг хөрөнгө оруулагчтай тохиролцон шийдвэрлэхийг Засгийн газарт үүрэг болгосон байсан юм. Мөн уг тогтоолын хэрэгжилтийг хангах чиглэлээр ажиллахыг өмнөх парламентын нэр бүхий 20 гишүүн нэг жилийн өмнө тухайн үеийн Ерөнхий сайд С.Батболдод шаардлага хүргүүлж байжээ. Гэвч олигтой үр дүнд хүрээгүй. Тиймээс шинээр байгуулагдсан парламентын тангаргаа өргөсөн 71 гишүүнээс 24 нь Оюутолгойн хөрөнгө оруулалтын гэрээтэй холбогдож УИХ-аас баталсан УИХ-ын 57 дугаар тогтоолыг шинэчлэлийн Засгийн газар хэрэгжүүлэх ёстой хэмээн үзэж, энэхүү шаардлагаа Ерөнхий сайдад хүргүүлж буй аж.