АН-ынхан сэтгүүлчидтэй сар бүр болздог уламжлалтай. Сонгуулиас болоод энэхүү болзоо хэсэг завсарлаад байсан юм. Тэд энэ уулзалтаа сэргээжээ. Өчигдөр болсон 4:11 уулзалтад УИХ дахь АН-ын бүлгийн дарга Д.Эрдэнэбат, дэд дарга С.Одонтуяа, АН-ын ерөнхий нарийн бичгийн даргын үүрэг гүйцэтгэгч Ц.Оюундарь нар оролцов. Уулзалтын үеэр сэтгүүлчид УИХ-ын сонгуулийн үеэр Увс аймагт мөнгө тараасан асуудлыг хууль шүүхийн байгууллага хэрхэн шийдвэрлэсэн талаар сонирхож байлаа. Үүнд УИХ дахь АН-ын бүлгийн дарга “Увс аймагт сонгуулийн үеэр  мөнгө тараасан нь баримтаар нотлогдож байхад Тагнуулын ерөнхий газар хариуцлагагүй хандлаа. Манай нам энэ асуудлаар ТЕГ-т хандах ёстой” гэв. АН-ын Ерөнхий нарийн бичгийн даргын үүрэг гүйцэтгэгч Ц.Оюундарь ажлаа аваад 14 хоног болж байгаа ч хийх ажил их байна гэдгээ дуулгалаа. Тэрээр намаас гарсан бүх шийдвэр шинжлэх ухааны үндэслэлтэй байх болно гэсэн юм. Тиймээс энэ чиглэлд анхаарлаа хандуулж ажиллана гэв.
АН-ынхан ойрын үед шүүхийн эрх зүйн орчинг шинэчлэх, төрийн албыг нийтийн алба болгох асуудлыг хэлэлцэхээр төлөвлөжээ. Түүнчлэн Үндсэн хуульд өөрчлөлт оруулж хотуудын асуудлыг шийдэх юм байна.