Нийслэлийн МАН-ынхан шинэ бүрэлдэхүүнээр шинэчлэл хийж ажиллаж эхэлж буй гэв. НИТХ-ын сонгуульд ялагдсан өмнөх удирдлага нь улс төрийн хариуцлага хүлээж албан тушаалаасаа огцорч, шинэ залуучуудаар багаа бүрдүүлжээ. Нийслэлийн МАН-ын дарга болсон Ц.Сандуй ”Шинэ бүрэлдэхүүнээр ажиллахаар дөрвөн дэд даргатай болж, таван хэлтэс шинээр байгууллаа. Бид эв нэгдэлийг эрхэмлэж, өнөөдрөөс эхэлж гишүүн бүртэйгээ тулж ажиллах болно. Орон нутгийн сонгуульд олон нийтэд танигдсан нэр цэвэр хүмүүс нэр дэвшүүлнэ” гэв.
Харин НИТХ дахь МАН-ын бүлэг өнөөдрөөс завсарлага авч буйгаа дуулгав. Тэд нийслэлийн Засаг дарга мөрийн хөтөлбөрөө НИТХ-аар оруулж батлуулахгүй, огт өөр ажилд анхаарал хандуулж байна. Мөн нийслэлийн төсөвт тодотгол хийх, өвөлжилтийн бэлтгэл ажил гээд анхаарал хандуулах олон асуудал бий. НИТХ-д олонхи болсон АН Мөрийн хөтөлбөрөө боловсруулан НИТХ-ын хуралдаанд оруулж батлуулах байх гэж хүлээж байтал албан тушаалын томилгоо, өөрчлөлт хийсээр байгаад гол ажилдаа анхаарахгүй байгаа учир завсарлага авлаа гэдгээ энэ үеэр мэдэгдлээ.