Халдварт өвчин судлалын үндэсний төвөөс гаргасан тооцоогоор долдугаар сарын 17-н гэхэд орон нутагт бүртгэгдэх халдварын тоо өдөртөө 1300-д хүрч, эмнэлэгт хэвтэх хүмүүсийн тоо 20 хувиар нэмэгдэнэ гэжээ.

 Өнөөдрийн байдлаар 20 аймагт нийт 30,299 халдварын тохиолдол бүртгэгдсэн.

Эмнэлэг болон тусгаарлах байранд 7,477 хүн хэвтэн эмчлүүлж байгаа. Орон нутагт халдварын тархалт нэмэгдсэн, эмнэлгийн ачаалал нэмэгдэж байгаатай холбоотойгоор өчигдрийн байдлаар 18 аймгийн 196 сум, зургаан тосгонд тодорхой хязгаарлалтын дэглэм тогтоосон бөгөөд энэ сарын 9-н гэхэд 13 аймгийн 101 суманд хязгаарлалтын хугацаа дуусаж байна. Харин 11 аймгийн 100 суманд хязгаарлалтын дэглэм үргэлжлэх төлөвтэй байгаа. Тиймээс УОК-оос хязгаарлалтын хугацаа нь дуусаж байгаа газруудад нэмэлтээр хязгаарлалт тогтоохгүй, хугацааг нь сунгахгүй байх чиглэлийг өгч байна. 

Тиймээс Үндэсний их баяр наадмын амралтын өдрүүдэд иргэдийг хот орчмын амралтын газруудад үйлчлүүлэхийг Улсын онцгой комиссоос зөвлөж байна.

Өнөөдрөөс эхлэн НЗДТГ-аас нийслэл орчмын амралт, жуулчны газруудтай хариуцлагын гэрээ байгуулан нээж эхэлсэн тул иргэдийг орон нутаг уруу зорчихоос урьтаж, нийслэл орчмоор амрахыг зөвлөж байгаа аж.

Өнөөдрийн байдлаар 0-18 насны 27480 хүүхэд өвчлөөд байгаа ба нийт тохиолдлын тоо 27 хувийг эзэлж байна. Тиймээс аялаж байгаа гэр бүлээс түүврийн аргаар 5-аас дээш насны хүүхдүүдээс шинжилгээ авах юм байна. Аяллаар явж байгаа гэр бүлээс авах шинжилгээ сайн дурын үндсэн дээр хэмээн тооцож төлбөртэй байх аж.

Мөн гэр бүлээрээ болон найз нөхдийн хүрээнд буюу аяллын багийн гишүүдийн тоог таваас хэтрүүлэхгүй байхыг УОК-оос зөвлөж байна.