УИХ-ын гишүүн Д.Батцогт, Г.Уянга тэргүүтэй “Амлалт нэхэх ард түмний холбоо”-ныхон Монгол Улсын Ерөнхий сайд Н.Алтанхуягт өнөөдөр бараалхаж Засгийн газрын 2012-2016 оны үйл ажиллагааны хөтөлбөрт тусгах есөн зүйл бүхий саналаа өргөн барилаа.
    Энэ саналд Оюу толгойн гэрээг талууд харилцан ашигтай байхаар өөрчлөх, хангайн бүс нутагт ашигт малтмал олборлохыг бүрэн хориглож, аялал жуулчлалын бүс болгох, иргэдийг төрийн үйл ажиллагаанд шууд оролцдог байх эрх зүйн орчин бүрдүүлэх, өрхийн тэргүүн бүрийг ажилтай болгох, дэлхийд өрсөлдөх чадвартай хүн бэлтгэхийн тулд “Монгол боловсрол” хөтөлбөр хэрэгжүүлэх, улс төрийн намуудыг гишүүнчлэлгүй болгох, сумдад аливаа намын анхан шатны байгууллага ажилладгийг хориглох, амлалтаа биелүүлдэггүй, ёс зүйгүй нам, улс төрчдөд хатуу хариуцлага тооцдог байх, Үндсэн хуулинд холбогдох өөрчлөлт хийх зэрэг санал багтжээ.  
    Ерөнхий сайд Н.Алтанхуяг саналыг хүлээн авч судлан, боломжтойг нь үйл ажиллагааныхаа хөтөлбөрт тусгана гэдгээ хэлсэн байна.