УИХ-ын Хууль зүйн байнгын хорооны өнөөдрийн хуралдаанаар “Засгийн газрын 2012-2016 оны үйл ажиллагааны хөтөлбөр батлах тухай” УИХ-ын тогтоолын төслийн анхны хэлэлцүүлгийг хийлээ. Хөтөлбөртэй холбоотойгоор УИХ-ын гишүүн Ж.Батзандан “Засгийн газрын мөрийн хөтөлбөрийн “Эрх чөлөөтэй монгол хүн” хэсэгт 20 гаруй нэмэлт, өөрчлөлт оруулах саналтай байна” гэдгээ хэлсэн юм. Мөн УИХ-ын гишүүн Р.Гончигдорж Үндсэн хуулийн 25-р зүйлийн 1-4-т нэгэнт заасан учир Засгийн газрын мөрийн хөтөлбөр дэх УИХ-ын бүрэн эрхэд хамаарах зарим асуудал, тухайлбал, “УИХ-д Өргөдлийн байнгын хороо байгуулж, шууд ардчиллын элементийг парламентын хяналтад оруулна, УИХ, Засгийн газрын нээлттэй сонсоголын хэлбэрүүдийг хуульчлан баталгаажуулна” гэсэн заалтуудыг мөрийн хөтөлбөрөөс хасахыг санал болгов. Байнгын хорооны гишүүд дээрх саналыг дэмжиж санал, дүгнэлтээ Төрийн байгуулалтын байнгын хороонд хүргүүлэхээр боллоо.