Засгийн газрын хуралдаанаас 2021 оны 11 дүгээр сарын 1-ний өдрөөс эхлэн урлаг соёл, спортын арга хэмжээг 50 хувийн дүүргэлттэйгээр нээхээр шийдвэрлэсэн.

Өнөөдөр Баянзүрх дүүргийн нутаг дэвсгэрт үйл ажиллагаа явуулж буй соёл урлаг, спорт, хоол үйлдвэрлэлийн чиглэлийн 400 гаруй ААН-үүдэд хариуцлагын гэрээний шинэчлэгдсэн заалтуудыг танилцуулан, зөвлөн туслах уулзалтыг хийж, хариуцлагын гэрээг шинэчлэн байгууллаа. Дүүргийн хэмжээнд нийт 2303 аж ахуйн нэгж үйл ажиллагаа явуулж байна.

Энэ үеэр дүүргийн дэд бүтэц, хот төлөвлөлтийн асуудал хариуцсан төслийн удирдагч Б.Батбаяр хэлэхдээ “Үйл ажиллагаагаа хэвийн үргэлжлүүлж байгаа салбарын ажилтан, алба хаагчид бүүстэр тундаа хамрагдсан байх шаардлагыг тавьж байгаа. Өнгөрсөн хугацаанд зөрчил гаргасан иргэн, ААН байгууллагуудад зөвлөн туслах, хугацаатай үүрэг даалгавар өгөх, сануулга, мэдэгдлүүдийг өгч ажилласан тухайгаа дурдаад харин иргэн, ААН байгууллагуудын хувьд хариуцлагатайгаар халдвар хамгааллын дэглэмээ баримтлан үйл ажиллагаагаа явуулж байгаа ч үйлчлүүлж буй иргэдийн хандлага, харилцаа сул байгаа нь эрсдлийг үүсгэж байна” гэлээ.

“Хариуцлагын гэрээ” хийсэн байгууллагууд хүний тоо хэтрүүлэх, цаг хэтрүүлэх гэх мэт зөрчлүүдийг удаа дараа гаргаж байсан нь хяналт шалгалтын явцад илэрч байсан юм.

Шинэчлэгдсэн “Хариуцлагын гэрээ”-ний заалтад 2 буюу түүнээс дээш удаа зөрчил гаргасан тохиолдолд “Хариуцлагын гэрээ”, тусгай зөвшөөрлийг цуцлах саналыг Улаанбаатар хотын Захирагчийн ажлын албанд хүргүүлнэ гэсэн онцлох заалт орсон байна.

Халдвар хамгааллын дэглэм, гэрээгээр хүлээсэн үүрэг болон УОК-ын журмыг зөрчсөн аж ахуйн нэгжүүдэд дээрх арга хэмжээг авах бөгөөд дүүргийн Хүнс худалдаа үйлчилгээний хэлтсээс гэрээний хэрэгжилтийг хангуулах хяналтыг эрчимжүүлж, аж ахуйн нэгжийн хүлээх хариуцлагыг зохицуулж ажиллах юм.