Нийслэлийн Онцгой байдлын газраас алба хаагчдын сахилга хариуцлага, дэг журам, цэрэгжилт жагсаалч байдал, цэргийн алба, сахилга ёс зүйг дээшлүүлэх зорилгоор “Сахилга хариуцлага, цэргийн албыг төлөвшүүлэх” сарын  аяныг зохион байгууллаа.

Аяны хүрээнд алба хаагчдын ажлын цаг ашиглалт, бүтээмж, үүрэг гүйцэтгэлтийн хэрэгжилтэд хяналт тавих, алба хаагчдын хариуцсан эд хөрөнгө, өрөө тасалгааны эмх цэгцийг сайжруулах, алба хаагчдын хууль, эрх зүйн мэдлэгийг дээшлүүлэх зорилгоор “Төрийн алба хаагчийн ёс зүй”, “Монгол Улсын Цэргийн нийтлэг дүрмүүд”, “Цэргийн дүрэмт хувцас өмсөх дүрэм”-ийн хүрээнд конспект бэлтгэн нийт 430 алба хаагчийг хамруулан сургалтыг зохион байгуулсан.

Мөн “Монгол Улсын цэргийн нийтлэг дүрэм”-ийн “Жагсаалын дүрэм”-ийн хүрээнд удирдамжид заагдсан үнэлгээний дагуу “Тэргүүний жагсаалч анги” шалгаруулах уралдааныг 4 үзүүлэлтээр дүгнэсэн байна.

Нийслэлийн Аврах анги болон Гал түймэр унтраах, аврах ангиудын  290 гаруй алба хаагч  жагсаалын үзүүлэх тоглолтыг хийж, баримтжуулан аяныг дүгнэх комисст ирүүлснээс “Тэргүүний жагсаалч анги”-аар 94.5 оноогоор нийслэлийн Аврах анги, хоёрдугаар байрт 92.8 оноогоор Чингэлтэй дүүргийн Онцгой байдлын хэлтсийн Гал түймэр унтраах, аврах 10 дугаар анги, 92.5 оноогоор Багануур дүүргийн Онцгой байдлын хэлтсийн Гал түймэр унтраах, аврах 64 дүгээр анги гуравдугаар байрыг тус тус эзэллээ.

Харин удирдамжинд заагдсан ажлуудын нийлбэр дүнгээр Багахангай дүүргийн Онцгой байдлын хэлтсийн Гал түймэртэй унтраах, аврах 80, Чингэлтэй дүүргийн Онцгой байдлын хэлтсийн Гал түймэртэй унтраах,аврах 10, нийслэлийн Аврах ангийн алба хаагчид манлайлан оролцлоо гэж нийслэлийн Онцгой байдлын газраас мэдээллээ.