УИХ-ын ээлжит бус хуралдааны өнөөдрийн хуралдаанаар Монгол бакны Ерөнхийлөгчиийг ажлаас нь чөлөөлөх, томилох асуудлыг хэлэлцэхээр болоод байгаа. Тэгвэл МАН-ын гишүүд Монгол банкны Ерөнхийлөгчийг томилох нь хууль бус зүйл гэж үзэж байгаа аж. Энэ талаар УИХ-ын гишүүн С.Бямбацогтоос тодрууллаа.

-Монголбанкны Ерөнхийлөгчийг чөлөөлж, томилох асуудал яагаад хууль бус гэж. Ямар учраас эсэргүүцээд байгаа юм бэ?
-Энэ томилгоог яагаад эсэргүүцэж байна вэ гэхээр ээлжит бус хуралдаанаар тийм тийм асуудлыгхэлэлцэнэ гээд хэлэлцэх асуудлыг жагсаалтыг гаргасан байдаг. Үүнийхээ дагуу тодорхой хугацаанд товлосон асуудлаа хэлэлцдэг хуультай. Гэтэл хэлэлцэх асуудлын дараалалд багтаагүй зүйлийг хүчээр оруулж ирж байгаа нь хууль бус.
-Монгол банкны Ерөнхийлөгчийг даруйхан томилохгүй бол валют ханшаас эхлээд монголын эдийн засаг, банк санхүүгийн салбарт хүндрэлтэй асуудал үүсч байгааг УИХ-ын дарга З.Энхболд хэлсэн шүү дээ. Энэ бүхэн хангалттай шалтгаан биш гэж үү?
-Энэ бол яах аргагүй тулгамдаж байгаа асуудлын нэг мөн. Гэхдээ Л.Пүрэвдоржийг ажлаас нь чөлөөллөө гээд түүний ажлыг орлох хүн олон байна шүү дээ. Тэргүүн дэд ерөнхийлөгч, дэд ерөнхийлөгч гэдэг албан тушаалтай хүн байгаа. Ийм байтал орлох хүнгүй, монгол банкны ажлыг явуулах хүнгүй болчихсон мэтээр ярих нь буруу юм.
-Тэгвэл АН олонхиороо энэ асуудлыг дэмжээд Н.Золжаргалыг баталчихвал хууль бус гэж ойлгох нь. Ер нь, хэзээ батлах нь зөв юм бэ?
-Хууль бус. АН мэдээж олонхиороо дэмжээд батлах байх. Гэхдээ энэ бол хуулийн дагуу явагдаагүй гэж хэлж болно. Ээлжит бус хуралдааны хугацаанд хэлэлцэх ёстой зүйлээ л хэлэлцэнэ. Харин Монгол бакны Ерөнхийлөгчийг УИХ-ын ээлжит чуулганаар томилох ёстой. Энэ бол сар хүрэхгүй хугацааны дараа л томилох асуудал шүү дээ.