УИХ-ын сонгуулиар Увс аймагт МАН-аас нэр дэвшиж өрсөлдсөн Б.Чойжилсүрэн, Ч.Хүрэлбаатар нар сонгогчдын санал худалдан авах зорилгоор мөнгө тараасан явдлыг баримтжуулсан нэр бүхий 13 гурван иргэн тойргийн хороонд гомдол гаргасан юм. Гэтэл тойргийн хороо нь үүнийг хууль зөрчөөгүй байна гэсэн шийдвэр гаргасныг нэр бүхий иргэд аймгийн Захиргааны хэргийн шүүхэд өгсөн байна. Харин аймгийн Захиргааны хэргийн шүүх энэ хэргийг өөрийн харьяаллын хэрэг биш гэж үзсэн тул иргэд захиргааны хэргийн давж заалдах шүүхэд өргөдөл гаргасныг өнөөдөр хэлэлцээд “Б.Чойжилсүрэн, Ч.Хүрэлбаатар нарын мөнгө тараасан хэргийг хууль зөрчөөгүй гэж үзсэн тойргийн хорооны хэргийг хянан шийдвэрлэх нь Захиргааны хэргийн шүүхийн харьяаллын хэрэг мөн” гэсэн тогтоол гаргасан байна.
Ийнхүү иргэдийн санал худалдан авахаар мөнгө тараасан нөхдийг хууль зөрчөөгүй гэж үзсэн Увс аймгийн тойргийн хорооны асуудлыг аймгийн Захиргааны хэргийн шүүх авч үзэх боллоо. Увс аймгийн захиргааны хэргийн шүүх тойргийн хорооны шийдвэрийг хууль зөрчсөн гэж үзвэл УИХ-ын гишүүнээр сонгогдоод буй Б.Чойжилсүрэн, Ч.Хүрэлбаатар нарыг эргүүлэн татах юм.