“Шүүх эрх мэдлийн хүрээнд шинэтгэлийг гүнзгийрүүлэх хөтөлбөр”-ийг хэрэгжүүлэх хүрээнд шүүхийн ил тод, нээлттэй байдлыг хангах зорилгоор “Шүүхийн шийдвэрийн цахим сан” /www.shuukh.mn/ хоёр сарын өмнө нээлтээ хийн ажиллаж эхэлсэн юм. Одоогийн байдлаар шүүхийн шийдвэрийн цахим санд  40 мянга шахам хэргийн 46500 шийдвэр, магадлал, тогтоол байршаад байгаа аж.
Шүүхийн шийдвэрийн цахим сангаас иргэд хүссэн шийдвэрээ харах  боломжтой бөгөөд өнөөдрийн байдлаар 110 мянга гаруй шийдвэрийг үзсэн тоо байгаа нь энэ сан эрэлт ихтэй байгааг харуулж байна.  Мөн тус санд бүртгүүлснээр шүүхийн шийдвэрийг бүрэн эхээр нь татах боломжтой. Одоогоор 600 орчим хүн бүртгүүлж, байнгын хэрэглэгч болж, 8000 гаруй шийдвэрийг бүрэн эхээр нь татсан судалгаа гараад байна.  Ийнхүү бүртгүүлэгчдийн 40 хувь нь өмгөөлөгч, хуулийн зөвлөх, 30 хувь нь оюутан, 30 хувь нь шүүх болон бусад байгуулагын ажилтан, энгийн иргэд байгаа гэнэ.