УИХ дахь МАХН-МҮАН-ын “Шударга ёс” эвслийн бүлэг хуралдаж Олон нийтийн радио, телевизийн Үндэсний зөвлөлийн зарим гишүүнийг сонгох тухай асуудлыг хэлэлцсэн байна.. Хуулиараа УИХ-аас дөрвөн хүний нэрийг санал болгох ёстой, харин төрийн бус байгууллагуудаас санал болгосон хүний нэрс 29-д хүрсэн. Эдгээрээс шигшээд Монголын зохиолчдын эвлэлийн тэргүүн Г.Мөнхцэцэг, “Боролдой” студийн захирал, УИХ-ын даргын зөвлөх Б.Мягмар, Бөхийн холбооны ерөнхийлөгч н.Нямдорж, Монголын Үйлдвэрчний эвлэлүүдийн холбооны дэд ерөнхийлөгч Б.Амгаланбаатар, гавьяат тамирчин Ц.Шаравжамц, Соёлын гавьяат зүтгэлтэн, яруу найрагч Г.Мэнд-Ооёо, н.Бадар-Ууган, “Нээлттэй нийгэм форум”-ын Ц.Ганболд, Төрийн шагналт зохиолч Б.Догмид нарын нэрс тунаж үлдээд буй аж. Гэхдээ МАХН, МҮАН-ын “Шударга ёс” эвслийн бүлгийн хурлаар  “Боролдой” студийн захирал, УИХ-ын даргын зөвлөх Б.Мягмарыг санал нэгтэй дэмжсэн байна. Б.Мягмар  УИХ-ын сонгуулиар “Шударга ёс” эвслийн PR –ыг гардан хийсэн нь ийн дэмжлэг авахад нөлөөлсөн бололтой. Мөн “Нээлттэй нийгэм форум”-ын Ц.Ганболдын хувьд МҮАН-ын дарга М.Энхсайхантай их ойр ажилладаг болохоор дэмжлэг авсан байна.  
Гэхдээ “шударга ёс” эвслийн бүлэг АН-ын бүлэгтэй саналаа нэгтгэнэ.
Олон нийтийн радио телевизийн Үндэсний зөвлөлийн 15 гишүүнээс наймынх нь бүрэн эрхийн хугацаа дуусгавар болсон тул шинээр томилох болоод байгаа юм.  Ингэснээр Монгол Улсын Ерөнхийлөгчөөс хоёр, Засгийн газраас мөн хоёр хүнийг тус бүр нэр дэвшүүлээд байгаа бол УИХ-ын зүгээс санал болгох дөрвөн нэр дэвшигчийг ярилцаж байж сонгох юм.