УИХ-ын Төрийн байгуулалтын байнгын хорооны хуралдаанаар Олон нийтийн радио, телевизийн Үндэсний зөвлөлийн зарим гишүүнийг сонгох тухай асуудлыг хэлэлцэж байна. Эл зөвлөлийн хувьд 15 байдаг аж. Өнөөдрийн байдлаар намын гишүүний бүрэн эрхийн хугацаа дууссан аж. Тиймээс Монгол Улсын Ерөнхийлөгчөөс Төрийн соёрхолт жүжигчин Д.Сосорбарам, Төрийн соёрхолт зохиолч Б.Цэнддоо нарыг хуульд заасны дагуу нэр дэвшүүлээд байгааг тус байнгын хорооны хурлаар хэлэлцэж дэмжлээ. Мөн Засгийн газраас Монголын Залуучуудын холбооны ерөнхийлөгч А.Мөнхбат, “Ирээдүйгээ аврах” хөдөлгөөний тэргүүн А.Арман нарыг дээрх зөвлөлийн гишүүнд нэр дэвшүүлснийг  ч мөн адил дэмжив. Харин УИХ-аас дөрвөн хүнийг нэр дэвшүүлэх ёстой ч 29 хүний нэрийг төрийн бус байгууллагуудаас санал болгосон тул УИХ-ын Төрийн байгуулалтын байнгын хорооны хуралдаанд оролцсон гишүүд саналын хуудас бөглөж дэмжиж байгаа хүмүүсийнхээ нэрсийг дугуйлав.  Ингэхэд Ц.Батмөнх, Д.Гоошоохүү, С.Мягмар, Л.Пүрэвдорж нар байнгын хорооны хуралдаанд оролцсон гишүүдийн 10-9-ынх нь саналыг авсан тул Олон нийтийн радио, телевизийн Үндэсний зөвлөлийн гишүүнд тус бүр нэр дэвшүүллээ. Ийнхүү Ерөнхийлөгчөөс хоёр, Засгийн газраас хоёр, УИХ-аас дөрвөн хүний нэрийг тус бүр нэр дэвшүүлснээр Олон нийтийн радио, телевизийн Үндэсний зөвлөлийн зарим гишүүдийг сонгох ажил шуударч, УИХ-ын чуулганы нэгдсэн хуралдаанаар батлагдах болж байна.