Эрүүл мэндийн сайд Н.Удвал ДОХ, сүрьеэ, хумхаа өвчинтэй тэмцэх “Глобаль сан”-гийн Зүүн Өмнөд Азийн бүсийн Монгол Улсыг хариуцсан менежер хатагтай С.Мюррэй болон дагалдах албаны бусад хүнийг ЭМЯ-нд хүлээн авч уулзжээ.
Монгол Улсын Засгийн газраас ХДХВ/ДОХ, БЗДХ, сүрьеэгээс сэргийлэх, тэмцэх чиглэлээр авч хэрэгжүүлж буй үндэсний хөтөлбөрүүдийн дийлэнх нь “Глобаль сан”-гийн санхүүгийн дэмжлэгтэйгээр хэрэгжиж байгаа. Хатагтай С.Мюррэй энэ удаа манай улсад хийж буй долоо хоногийн ажлын айлчлалаар тус сангийн дэмжлэгтэй хэрэгжүүлж буй хөтөлбөрүүдийн явц, байдалтай танилцаж, үнэлгээ хийх аж. Түүнчлэн дэлхийн эдийн засгийн хямралын үр дагавар болон “Глобаль сан”-д тулгарч байгаа санхүүжилтийн хүндрэлийн талаар мэдээлжээ.