"Оюу Толгой" ХХК-д туслан гүйцэтгэгч компанийн ажилчид өнөөдөр Хөдөлмөрийн тухай хуулийн шинэчилсэн найруулгын хүрээнд албажаагүй журмаар цалинг нь үндэслэлгүй бууруулсан хэмээн эсэргүүцлээ илэрхийлэн мэдэгдэл хийлээ. Тэд "Өмнө нь цалин дээр илүү цагийг тооцож өгдөг байсан бол Хөдөлмөрийн тухай хуулийн шинэ хуулийн хүрээнд илүү цагийн мөнгийг өгөхөө больсон. Урьд нь гүний уурхайд ажилладаг хүн илүү цагаа тооцуулаад 28 хоног ажиллахад 4 сая гаруй төгрөгийн цалин авдаг байсан бол одоо өдөрт 12 цаг ажиллаад ердөө л 1,7 сая төгрөг авч байна. Ингэж туслан гүйцэтгэгч компанийн ажилтнуудын хөдөлмөрийн үндэслэлгүйгээр мөлжиж болохгүй. Олон мянган гэр бүлийн амьдрал үүний ард байгаа. "Оюу толгой" компани ашигтай ажилласан гэж олон улсад өөрсдийгөө сурталчилж мэдээлдэг. Гэвч монгол ажилчдынхаа цалин мөнгийг хууль бусаар хасаад байдаг. Өнөөдөр "Оюу толгой" төсөл дээр 600 мянган төгрөг аваад ажилладаг мянга мянган хүн байгаа. Түүнчлэн гэрээт компаниудаараа дамжуулан хууль бус үйлдэл хийлгэж, тендер нэрээр дарамталдаг. Улмаар туслан гүйцэтгэх компанийн ажилчид маш бага цалингаар хөдөлмөрөө үнэлүүлж байна. Ингэснээр 10 мянга гаруй хүний эрхийг зөрчиж, хариуцлагаас бултаж зугтааж байгаа. Туслан гүйцэтгэгч компаниуд бид хөдөлмөрийн хүнд нөхцөлд ажилладаг хүмүүс. Гэтэл ийм бага цалингаар ар гэрээ авч явах ямар ч боломжгүй байна" хэмээн ярьж байна.
