БНХАУ-тай энэ сарын 1-нээс эхлэн Гашуунсухайт боомтоор өдөрт нүүрс тээврийн 300 автомашин гаргаж байхаар тохиролцсон боловч тус улс дахь Ковид19 вирусын халдварын тархалттай холбоотойгоор хэрэгжих боломжгүй байсан. Харин энэ сарын 23-ны өдрөөс эхлэн өдөрт нүүрс тээврийн 300 авто машин гарч эхэллээ. Цаашид БНХАУ дахь вирусын халдвар эрчимтэй хумигдвал 300-аас илүү автомашин хилээр нэвтрүүлэх боломжтой юм байна. Энэ оны нэгдүгээр улирлын байдлаар манай улс 2.5 сая тонн чулуун нүүрс экспортолсон нь 2021 оны мөн үеэс 62.2 хувиар буурсан үзүүлэлт юм.
Монгол Улс БНХАУ-тай энэ оны эхний улиралд 2.1 тэрбум ам.долларын худалдаа хийсэн нь гадаад худалдааны бараа эргэлтийн 56.6 хувийг эзэлж буй аж. Хятад Улсад экспортолсон бараа, бүтээгдэхүүний 46.5 хувийг зэсийн баяжмал, 41 хувийг чулуун нүүрс эзэлж байна.
