Сүхбаатар дүүргийн шүүх өнөөдөр “Зууны мэдээ” сонины сэтгүүлч Д.Болормаад холбогдох хүний нэр төрд халдсан гэх хэргийг хаалттай хэлэлцэж, шийдвэрлэлээ. Тодруулбал, сэтгүүлч Д.Болормааг бусдын нэр төрд халдсан гэж хөдөлмөрийн хөлсний доод хэмжээг 61 дахин нэмэгдүүлсэнтэй тэнцэх хэмжээний мөнгө буюу 8.564.400 төгрөгөөр торгох шийдвэр гаргасан байна.
Тэрээр хоёр жилийн өмнө “Мон Уран”-ы Б.Наранхүүг өсвөр насны охидыг садар самуунд уруу татсан хэргээр шалгаж эхэллээ” гэсэн гарчигтай нийтлэл бичсэнийх нь төлөө ийн шийтгэлээ. Нийтлэлдээ бага насны /дунд сургуулийн 14-15 насны сурагчид/ охидын онгон биеийг 400 ам.доллараар худалддаг, худалдан авдаг зохион байгуулалттай гэмт хэргийн сүлжээнд “Мон Уран” компанийн захирал, одоогийн УИХ-ын гишүүн  Б.Наранхүү холбоотой тухай тусгажээ. Тиймээс Б.Наранхүү сэтгүүлчийг хэвлэл мэдээллийн хэрэгслээр дамжуулж нэр төрд халдлаа хэмээн хууль хяналтын байгууллагад хандсан юм.
Шүүх хурлыг шүүгч Ш.Төгсгэрэл даргалсан бол улсын яллагчаар Ш.Баярбилэг, Д.Болормаагийн өмгөөлөгчөөр Ц.Монгол, нэхэмжлэгчээр УИХ-ын гишүүн, “Мон Уран”-ы захирал  Б.Наранхүүгийн өмгөөлөгчөөр Б.Билэгсайхан нар оролцлоо. Өмнө нь анхан шатны шүүхээс шүүгдэгчийг гэмт хэргийн шинжтэй нийтлэл нийтлээгүй гэсэн шалтгаанаар цагаатгасан удаатай. Гэвч нэхэмжлэгчийн зүгээс давж заалдах шатны шүүхэд гомдол гаргаснаар Нийслэлийн шүүхээс хэргийг нэмэлт мөрдөн байцаалтад буцаасан юм.