Шинэ  Засгийн газрын ээлжит хуралдаанаар яамдын дэд сайдуудыг томилсон билээ. Тиймээс Зам, тээврийн  дэд сайдаар томилогдсон Х.Ержаныг  өнөөдөр яамныхан нь хүлээн авсан юм.
Зам тээврийн сайд А.Гансүх  дэд сайдад Х.Ержанд хандан яамдын  удирдлага болох албад, хэлтсийн дарга нараа танилцуулахдаа “Манайхан салбартаа олон жил ажилласан мэргэшсэн хүмүүс. Тиймээс салбарын ажилтай танилцах гэдэг асуудалд цагаа үрэхгүйгээр ажилдаа орцгоосон баг” гэдгийг тодотгож байлаа.
Дэд сайд Х.Ержаны хувьд “Миний бие автын инженер мэргэжилтэй.  Нэлээд хэдэн жил тээврийн салбарт ажиллаж байсан нэгэн. Тиймээс салбартаа 10 гаруй жил ажилласан мэргэшсэн багтай гар нийлэн ажиллах болсондоо баяртай байна. Мөн  А.Гансүх сайд  ч  өмнө нь салбартаа дэд сайдаар ажиллаж байсан туршлагатай хүн гэдгийг мэднэ.  Зам, тээврийн салбарт Засгийн газрын бодлогыг хэрэгжүүлэхэд Та бүхэнтэйгээ хамтарч ажиллахад бэлэн байна” гэдгээ онцлов.  
 Зам, тээврийн дэд сайд Х.Ержан нь Эрхүүгийн политехникийн их сургуульд инженерийн мэргэжлээр суралцаж төгсөөд Тайваньд төрийн захиргаа, удирдлагын чиглэлээр  мэргэжил дээшлүүлсэн нэгэн аж. Ийнхүү Зам, тээврийн салбарыг хөгжүүлэх бодлогыг атгаж,  хөгжлийг тодорхойлох баг ийнхүү мэргэшсэн удирдлагаас бүрдлээ.