Нийслэлийн шүүх өглөө 08:00 цагаас МАХН-ын дарга, Ерөнхийлөгч асан Н.Энхбаяр нарт холбогдох хэргийг хэлэлцэж эхэллээ. Шүүхийн танхимд яллах болон өмгөөлөх тал хүрэлцэн ирсэн бол яллагдагч нараас хэнийг нь ч оролцуулсангүй. Яллагдагч Н.Энхбаяр давж заалдах шатны шүүх хуралд биечлэн оролцох хүсэлт гаргасан ч шүүх бүрэлдэхүүн танхимын хүрэлцээ муу учраас оролцуулах боломжгүй гэсэн шийдвэр гаргалаа. Түүнчлэн түүний өмгөөлөгч Б.Оюунбилэг үйлчлүүлэгчээ шүүх хуралд оролцуулах хүсэлт гаргасан боловч шүүх хурлыг даргалагч шүүгч Б.Сарантуяа эмч нарын дүгнэлтийг үндэслэж Н.Энхбаярыг шүүх хуралд оролцуулахгүй гэлээ. Н.Энхбаярыг хэвтрийн дэглэм сахиж, эмчлүүлэх шаардлагатай гэж эмч нар дүгнэлт гаргасан байна. Шүүх хурал одоогоор үргэлжилж байна.