УИХ-ын Төрийн байгуулалтын байнгын хорооны дэргэдэх Сонгогчдын нэрсийн жагсаалтын бүртгэлийн хяналтын дэд хороо нээлттэй сонсгол хийлээ. Сонсголд УИХ-ын дарга З.Энхболд, УИХ-ын гишүүн Р.Бурмаа, Р.Гончигдорж, тус дэд хорооны дарга Ж.Батзандан нар оролцлоо. Мөн СЕХ-ны ажилтнууд, УБЕГ-ын холбогдох албан тушаалтнууд болон дүүрэг салбарын бүртгэлийн ажилтнууд, улс төрийн намын төлөөлөл, төрийн бус байгууллагын төлөөлөгчид сонсголд ирсэн байлаа. Сонгуулийн хамгийн чухал зүйл болох сонгогчдын нэрсийн жагсаалттай холбоотой асуудал, нийтлэг зөрчил нь юу байгаа зэргийг албаны хүмүүсээс нь сонссон юм. Гэвч УБЕГ-ынхан асуултад бүрэн хэмжээний хариулт өгч чадахгүй байв. Ажилдаа ороод удаагүй хэлстийн дарга нар болон хүмүүсийн мэдэхийг хүссэн зүйлийг хариулах хэмжээний мэдээлэлтэй албан тушаалтан сонсголд ирээгүй байсан гэхэд болно. Ямар ч байсан орон нутгийн сонгуулийн өмнө ингэж сонсгол хийснээр аль аль талдаа хариуцлагатай ажиллах байх гэж найдсан гэлээ. Орон нутгийн сонгууль болохоос 60 хоногийн өмнө сонгогчдын шилжилт хөдөлгөөнийг түр хаасан гэдгээ энэ үеэр хэлсэн. Өөрөөр хэлбэл, энэ сарын 23-наас орон нутгийн сонгуулийн санал авах өдөр болох арваннэгдүгээр сарын 21-нийг хүртэл шилжүүлэг хийхгүй, өөрийн бүртгэлтэй хаягаараа очиж, саналаа өгөхийг дуулгасан юм.