Жендэрийн тэгш байдлын тухайн хуулийг 2011 оны хоёрдугаар сард баталсан. 16 жилийн турш яригдаж байж батлагдсан энэ хууль 2013 оны нэгдүгээр сарын 1-ээс эхлэн хэрэгжих юм. Тиймээс хэрхэн хэрэгжүүлж, яаж хяналт тавих талаар өчигдөр төрийн болон төрийн бус байгууллагын төлөөлөл зөвлөлдөв. УИХ-ын эмэгтэй гишүүдийн бүлэг, Жендэрийн үндэсний хороо, НҮБ-ын Хүн амын сан, Монголын эмэгтэйчүүдийн ТББ-ын үндэсний сүлжээ хамтран эл хэлэлцүүлгийг зохион байгуулсан юм. Манай улсад хүйсийн тэгш харьцаа алдагдсан учраас төр засгийн төвшинд хэрхэн ажиллах талаар зөвлөлдсөн нь энэ. Тэд ирэх оноос хэрэгжүүлж эхлэх Жендэрийн тэгш байдлын тухай хуулийг монгол улсын өнцөг булан бүрт, бүх салбарт хэлэлцүүлэх нь хамгийн чухал хэмээн үзэж, хамтран ажиллахаар боллоо.