УИХ-ын намрын ээлжит чуулганы өнөөдөр нээлтээ хийнэ. Нээлтийг 10 цагт эхлүүлэхээр болж. Уг нь, өмнөх парламентуудын шар хуудсыг нээж үзвэл ихэвчлэн морин цагт буюу 11:00-12:00 цагт эхлэдэг байж. Харин энэ удаад УИХ-ын дарга З.Энхболд чуулганы хуралдааныг эрт эхлүүлэхээр шийджээ. Энэ чуулганаас их зүйлийг иргэд хүлээж байгаа нь ойлгомжтой. Наанадаж иргэдийн төлөөлөл болсон хүмүүсийг тангарагийг нь өргүүлж, элэг бүтэн, бүрэн чадамжтайгаар үйл ажиллагаагаа явуулаасай гэж хүлээж буй. Энэ чуулганаар Шударга ёс эсвлийн бүлгийн гишүүн Ц.Оюунбаатар тангарагаа өргөнө. Тэрээр “Би хэзээ л бол хэзээ тангарагаа өргөхөд бэлэн байгаа” гэж сонин хэвлэлүүдэд мэдэгдсэн байна. Мөн энэ чуулганд Баянзүрх, Сонгинохайрхан дүүргийн иргэдийн төлөөллүүд орж ирэх дамжиггүй. Түүнээс гадна Өвөрхангай аймгийн иргэдийн ч төлөөллийг оруулах нь гарцаагүй үнэн. Мөн үүнд улс төрийн хүрээнд болоод иргэдийн анхаарлыг татаж байгаа асуудал нь МАН бүлэг байгуулах тухай асуудал. УИХ-ын дэгийн тухай хуульд нэмэлт өөрчлөлт оруулбал МАН бүлэг байгуулж, УИХ, Байнгын хороодын хуралдаанд оролцож ажиллах чадамжтай болно. Үүнийгээ дагаад тус намаас УИХ-ын дэд дарга сонгогдох учиртай. Ингэвэл УИХ түүхэндээ анх удаа гурван дэд даргатайгаар үйл ажиллагаа явуулах юм.  
Харин энэ чуулганаар хэд хэдэн чухал хуулийн төсөл хэлэлцэнэ. Нэн түрүүнд ирэх оны төсвийг хэлэлцэнэ батална. Түүнээс гадна Хэвлэл мэдээллийн эрх чөлөөний тухай хуулийн төслийг хэлэлцэх юм. Энэ хуулийн төслийг өмнө нь өмнөх парламент хэлэлцэж байгаа хойш тавиад байсан бол энэ удаагийн парламент бүрэн эрхийнхээ хүрээнд хэлэлцэн батлах аж. Эл хууль нь дан ганц хэвлэлийн эрх чөлөө гэхээсээ илүүтэй иргэдийн мэдээлэл олж авах эрх нь баталгаажиж байгаагаараа онцлогтой.

Намрын чуулганаар хэлэлцэх асуудлын дараалал:
1.    Монгол Улсын 2011 оны төсвийн гүйцэтгэл, Засгийн газрын 2011 оны санхүүгийн нэгдсэн тайлан,
2.    Монгол Улсын Их Хурлын тухай болон Монгол Улсын Их Хурлын чуулганы хуралдааны дэгийн тухай хуулиудад өөрчлөлт оруулах тухай хуулийн төслүүд,
3.    Хадгаламжийн даатгалын тухай хуулийн төсөл,
4.    Хэвлэл мэдээллийн эрх чөлөөний тухай хуулийн төсөл
5.    Үнэт цаасны зах зээлийн тухай хуулийн төсөл
6.    Хүнсний тухай, Хүнсний бүтээгдэхүүний аюулгүй байдлыг хангах тухай хуулийн төслүүд
7.    “Монгол Улсын хууль тогтоомжийг 2016 он хүртэл боловсронгуй болгох үндсэн чиглэл батлах тухай” Улсын Их Хурлын тогтоолын төсөл,
8.    “Төрөөс мөнгөний бодлогын талаар 2013 онд баримтлах үндсэн чиглэл батлах тухай” Улсын Их Хурлын тогтоолын төсөл,
9.    Монгол Улсын 2013 оны төсвийн тухай хуулийн төсөл,
10.    Хүний хөгжил сангийн 2013 оны төсвийн тухай хуулийн төсөл
11.    Нийгмийн даатгалын сангийн 2013 оны төсвийн тухай хуулийн төсөл
12.    Бусад.